Dow Jones Industrial Average-მა ვაჭრობის დასრულებისას ისტორიული რეკორდი დაამყარა და 52 000-იან ნიშნულს გადააჭარბა. ბაზარზე ამ ცვლილებას ინვესტორების მიერ სტრატეგიის შეცვლა უძღოდა წინ: კაპიტალი ტექნოლოგიური სექტორიდან ციკლურ აქციებში გადავიდა, რაც ნავთობის ფასების მნიშვნელოვან კლებას უკავშირდება.

30-კომპონენტიანი ინდექსი 330.61 პუნქტით, ანუ 0.64%-ით გაიზარდა. პარალელურად, S&P 500-მა 0.57%-იანი, ხოლო Nasdaq Composite-მა 1.15%-იანი კლება აჩვენა, რაც ძირითადად ჩიპების მწარმოებელი კომპანიების აქციების გაუფასურებამ გამოიწვია.

Advanced Micro Devices-ის აქციები 5%-ზე მეტით შემცირდა, Broadcom-ისა და Micron Technology-ის მაჩვენებლები კი 3%-ით დაეცა. Nvidia-ს ფასი 1%-ზე მეტად შემცირდა.

ნავთობის ბაზარზე Brent-ის ტიპის ნედლი ნავთობის ფიუჩერსები 5%-ით შემცირდა და ბარელზე 80 დოლარიან ნიშნულს ქვემოთ ჩამოვიდა, რაც მარტის შემდეგ პირველი შემთხვევაა. West Texas Intermediate-ის ფასი დაახლოებით 75 დოლარამდე დაეცა.

ენერგომატარებლების გაიაფებამ ინდუსტრიული სექტორის წარმომადგენლების, მათ შორის Caterpillar-ის ზრდა გამოიწვია. ასევე პოზიტიურად დასრულდა ვაჭრობა JPMorgan Chase-ისთვის, რადგან ინვესტორები ენერგიის დაბალ ფასებს აშშ-ის ეკონომიკის სტიმულირების ფაქტორად განიხილავენ.

განსაკუთრებული ყურადღების ცენტრში კვლავ SpaceX რჩება. კომპანიის აქციები 9%-ით გაიზარდა, რამაც იგი საბაზრო კაპიტალიზაციით Microsoft-სა და Amazon-საც კი გაუსწრო. SpaceX-ის აქციების ფასი ამჟამად 210 დოლარის ფარგლებში მერყეობს, მაშინ როცა IPO-ს დროს საწყისი ფასი 135 დოლარი იყო.

ამერიკული ბაზრის ოპტიმიზმი ნაწილობრივ უკავშირდება აშშ-სა და ირანს შორის მიღწეულ შეთანხმებას, რომელიც ახლო აღმოსავლეთში სამხედრო მოქმედებების შეწყვეტას ითვალისწინებს. პაკისტანის პრემიერ-მინისტრის განცხადებით, მხარეები საბრძოლო ოპერაციების დასრულებას ოფიციალურად პარასკევს, შვეიცარიაში დაადასტურებენ.

ექსპერტთა შეფასებები

Nomura Asset Management-ის მთავარი საინვესტიციო სტრატეგი, ენდი გოლდბერგი სიფრთხილისკენ მოუწოდებს. მისი თქმით, ნავთობის ფასის მკვეთრმა კლებამ შესაძლოა ინფლაციაზე საპირისპირო ეფექტი მოახდინოს, რადგან მომხმარებლის ხელში მეტი თავისუფალი თანხა დარჩება, რაც მოთხოვნას გაზრდის.

პარალელურად, ანალიტიკოსები ყურადღებას ამახვილებენ ფედერალური სარეზერვო სისტემის (Fed) პოლიტიკაზე. ყოფილი გუბერნატორი მირანი აცხადებს, რომ მარეგულირებელი ზედმეტად არის ორიენტირებული წარსულ მონაცემებზე და ნაკლებად უყურებს მომავლის გამოწვევებს.

3 ფოტო — დააჭირე გასადიდებლად