გლობალური ფინანსური ბაზრები აშშ-სა და ირანს შორის დაპირისპირების გახანგრძლივებისთვის ემზადებიან. დიპლომატიური გზით პრობლემის სწრაფი გადაჭრის მოლოდინი სულ უფრო მცირდება, რადგან მხარეებს შორის სამხედრო აქტივობა კვლავ გრძელდება.

ესკალაცია მას შემდეგ გამწვავდა, რაც აშშ-ის ცენტრალურმა სარდლობამ ირანულ სამხედრო ობიექტებზე საპასუხო დარტყმები განახორციელა. თეირანმა საპასუხოდ ყურის ქვეყნებზე იერიში მიიტანა, რამაც რეგიონში დაძაბულობის ახალი ტალღა გამოიწვია.

ინვესტორები ახლა ე.წ. „გრძელვადიანი კრიზისის“ (long grind) სცენარისთვის ემზადებიან. გლობალური ბაზრის სტრატეგების აზრით, ბაზარმა უკვე გადაინაცვლა ცეცხლის შეწყვეტის მოლოდინიდან კონფლიქტის გახანგრძლივების ფასის შეფასებაზე.

„როდესაც მედიაცია იშლება და დარტყმები გრძელდება, ბაზრები აღარ ითვლის დროებით ინფლაციურ შოკს. ჩვენ ვხედავთ კაპიტალის ღირებულების გადაფასებას გეოპოლიტიკური გაურკვევლობის პირობებში“, — აცხადებს Global X ETFs-ის სტრატეგი ბილი ლიუნგი.

რა ხდება ენერგორესურსების ბაზარზე?

მიუხედავად ჰორმუზის სრუტეში სატრანსპორტო შეფერხებებისა, ნავთობის ფასმა 100-დოლარიანი ნიშნული არ გადალახა. ტრეიდერები თვლიან, რომ აშშ-ის ენერგორესურსების ექსპორტი და სტრატეგიული რეზერვების გამოთავისუფლება ჯერჯერობით საკმარის ბუფერს ქმნის მიწოდების სრული კოლაფსის თავიდან ასაცილებლად.

თუმცა, ენერგომატარებლების მაღალი ფასი და სესხების გაზრდილი საპროცენტო განაკვეთები ინვესტორებისთვის მთავარ გამოწვევად რჩება. ანალიტიკოსების თქმით, ეპოქა, როდესაც ყველაფრის ყიდვა მომგებიანი იყო, დასასრულს უახლოვდება.

რეიტინგების გაუარესება

Fitch Ratings-მა ამ კვირაში გლობალური სუვერენული სექტორის პროგნოზი „ნეიტრალურიდან“ „გაუარესებულამდე“ შეამცირა. სააგენტო მიიჩნევს, რომ აშშ-ირანის კონფლიქტი გლობალურ ეკონომიკურ ზრდას შეანელებს, ინფლაციას კი გაზრდის.

„როგორც აშშ, ისე ირანი თვლიან, რომ დრო მათ სასარგებლოდ მუშაობს. არც ერთ მხარეს არ აქვს ინტერესი, დათმობებზე წავიდეს“, — აღნიშნავს Lipow Oil Associates-ის პრეზიდენტი ენდი ლიპოუ. მისი თქმით, ჩიხური სიტუაცია შესაძლოა კიდევ დიდხანს გაგრძელდეს.

მიუხედავად ამისა, ზოგიერთი ექსპერტი ინვესტორებს სიმშვიდისკენ მოუწოდებს. Invesco-ს კვლევების ხელმძღვანელი ბენჯამინ ჯოუნსი აღნიშნავს, რომ ბაზრები ისტორიულად მიჩვეულია გეოპოლიტიკურ რყევებს და ხშირად, გაყიდვების ტალღას სწრაფი აღდგენა მოსდევს.