ჰოლივუდი ახალი ფენომენის წინაშეა: მაყურებელმა უარი თქვა მასიურ ფრენჩაიზებზე და უპირატესობას დაბალბიუჯეტურ, ორიგინალურ პროექტებს ანიჭებს. გასული ორი კვირის განმავლობაში, YouTube-ის კონტენტზე დაფუძნებულმა ჰორორებმა, „Backrooms“-მა და „Obsession“-მა, კინოგაქირავებაში ლიდერი პოზიციები დაიკავეს.

ფილმ „Backrooms“-ის პროდიუსერი პიტერ ჩერნინი მიიჩნევს, რომ ჰოლივუდის სტუდიების მცდელობა, სასწრაფოდ აამუშაონ YouTube-ის ავტორები, დიდი შეცდომაა. მისი თქმით, ეს არ განსხვავდება გაგრძელებების (sequels) წარმოებისგან და მხოლოდ არსებულ ტალღაზე შეხტომას წარმოადგენს.

„თქვენი სამუშაო არის ინოვაცია და ახალი იდეების ძიება. როდესაც მხოლოდ პოპულარულ ტალღას მიჰყვებით, ინოვაცია ქრება“, — აცხადებს ჩერნინი, რომელსაც „ტიტანიკისა“ და „ავატარის“ მსგავსი გიგანტების მართვის გამოცდილება აქვს.

„Backrooms“-ის წარმატება უნიკალურია: 10 მილიონი დოლარის ბიუჯეტით შექმნილმა ფილმმა ექვს დღეში 100 მილიონი დოლარი შეაგროვა. მაყურებელთა 86% 35 წლამდე ასაკის ახალგაზრდაა, რაც ადასტურებს, რომ აუდიტორია ცვლილებას ელოდება. ჩერნინის თქმით, სტუდიები წლების განმავლობაში ჩაციკლულები იყვნენ „ბრენდ მენეჯმენტზე“, რაც მაყურებლისთვის დამღლელი გახდა.

ანალიტიკოს ერიკ ჰენდლერის აზრით, ახალგაზრდა თაობას სურს კინოთეატრში სიარული, მაგრამ მათ აინტერესებთ განსხვავებული გამოცდილება. „მათ არ სჭირდებათ 250-მილიონიანი ფილმი, რომ დაინტერესდნენ. მათ სჭირდებათ საინტერესო კონცეფცია“, — აღნიშნავს ჰენდლერი.

პიტერ ჩერნინი ასკვნის, რომ ჰოლივუდმა რისკის აღება უნდა ისწავლოს. მისი აზრით, ბოლო 10 წლის განმავლობაში ინდუსტრიამ რისკი „უგუნურებად“ გამოაცხადა, რაც წარმატების მთავარი შემაფერხებელი ფაქტორი გახდა. სტუდიებმა უნდა შეძლონ ბალანსის პოვნა ბიუჯეტსა და ორიგინალურობას შორის, რადგან სწორედ რისკშია დამალული ინდუსტრიის მომავალი ზრდა.