„ნაციონალური მოძრაობის“ წევრი ანა წითლიძე პარტიაში დაგეგმილ რეფორმებსა და ახალი კადრების შემოსვლის მნიშვნელობაზე საუბრობს. მისი თქმით, ნანუკა ჟორჯოლიანის პოლიტიკური აქტიურობა პარტიისთვის დამატებითი რესურსია, რაც ორგანიზაციას „ახალი სუნთქვის“ გახსნაში დაეხმარება.

წითლიძის განმარტებით, უკანასკნელი ორი თვის განმავლობაში პარტიაში ინტენსიური სამუშაოები მიმდინარეობს. პროცესში ჩართულია როგორც მიხეილ სააკაშვილი, ისე პოლიტიკური საბჭო და პარტიის რიგითი წევრები. რეფორმირების აუცილებლობა გამოწვეულია იმ პოლიტიკური გამოწვევებით, რომელთა წინაშეც პარტია დგას, მათ შორის, საკონსტიტუციო სარჩელით, რომელიც პოლიტიკური გაერთიანების შესაძლო აკრძალვას ითვალისწინებს.

„ჩვენ ვმსჯელობთ, როგორ უნდა გადაეწყოს პარტია და როგორ გახდეს ის უფრო ღია ახალი კადრებისთვის. ნანუკა ჟორჯოლიანის შემართება და საქმიანობა სწორედ ამ პროცესისთვის იქნება ხელშემწყობი. ჩვენ მივესალმებით ნებისმიერ ახალ ადამიანს, რადგან ეს პარტიის სიძლიერის ნიშანია“, — აღნიშნა ანა წითლიძემ.

3 ფოტო — დააჭირე გასადიდებლად

პოლიტიკოსმა ასევე ხაზი გაუსვა, რომ პარტიის შიდა პროცესები რეგულარულ ხასიათს ატარებს. ივლისის ბოლოს პარტიის ხელმძღვანელი პირების, მათ შორის თავმჯდომარისა და პოლიტსაბჭოს უფლებამოსილების ვადა იწურება, რაც ყრილობის ჩატარების სამართლებრივ საფუძველს ქმნის.

კითხვაზე, განიხილება თუ არა ნანუკა ჟორჯოლიანი პარტიის თავმჯდომარის პოსტზე, ანა წითლიძემ განაცხადა, რომ ეს საკითხი ყრილობის ექსკლუზიური კომპეტენციაა. მისი თქმით, დეტალებზე საუბარი ჯერ ნაადრევია, რადგან გადაწყვეტილებებს პოლიტიკური საბჭო და თავად ყრილობა მიიღებს.

„ნანუკას აქვს ხალხთან მუშაობის დიდი გამოცდილება. თუმცა, ვინ დაიკავებს ხელმძღვანელ პოზიციებს, ეს ყრილობაზე გახდება ცნობილი. ჩვენი მიზანია, პარტია იყოს მუდმივად განახლების პროცესში“, — დაასკვნა წითლიძემ.