იურიდიულ საკითხთა კომიტეტის თავმჯდომარემ, არჩილ გორდულაძემ პარლამენტის პლენარულ სხდომაზე ოპოზიციური ფრაქცია „საქართველოსთვის“ წევრები მწვავედ გააკრიტიკა. გორდულაძის თქმით, ოპონენტების მხრიდან გაჟღერებული პათეტიკური განცხადებები მხოლოდ პოლიტიკური ქულების დაწერის მცდელობაა.

„კოლექტიური ნაცმოძრაობის“ განყოფილება, რომელსაც „გახარიელებს“ უწოდებენ, პირდაპირ იმეორებს იმ გარედან დაფინანსებული ორგანიზაციების გზავნილებს, როგორებიცაა „საია“. მათ აქვთ პოლიტიკური აუტანლობა ნებისმიერი კანონმდებლობის მიმართ, რომელიც ქვეყანაში მშვიდობას ემსახურება“, - განაცხადა გორდულაძემ.

3 ფოტო — დააჭირე გასადიდებლად

მან ხაზი გაუსვა, რომ ოპოზიცია ცდილობს, ქვეყანაში „შავი ფულის“ შემოდინებას ხელი შეუწყოს, რაც, მისივე თქმით, ხელისუფლების ძალადობრივი გზით შეცვლისთვის გამოიყენება. გორდულაძემ ოპონენტებს „პოლიტიკური სვავები“ უწოდა და აღნიშნა, რომ მათთვის საზოგადოებრივი კეთილდღეობა მეორეხარისხოვანია.

კომიტეტის თავმჯდომარემ ყურადღება გაამახვილა იმ ფაქტზეც, რომ ოპოზიცია დუმს პარლამენტის მიერ „მაუწყებლობის შესახებ“ კანონში შეტანილ ცვლილებებზე, რომელიც მიუკერძოებლობისა და ფაქტისა და აზრის გამიჯვნის პრინციპებს ემსახურება. გორდულაძის მტკიცებით, ოპონენტები მხოლოდ ნეგატიურ კონტექსტს ეძებენ, მაშინ როდესაც ქვეყანაში სიღარიბის დონე მცირდება და მშვიდობაა უზრუნველყოფილი.

„ჩვენი გუნდი გააგრძელებს მუშაობას თითოეული მოქალაქისთვის, სანამ ერთი ადამიანი მაინც იქნება შეჭირვებული. თქვენ კი, პოლიტიკური სვავების მსგავსად, მხოლოდ ტრაგედიებს იყენებთ საკუთარი ბენეფიტებისთვის“, - დასძინა მან.

გორდულაძემ ასევე გააკრიტიკა ოპოზიციის ინიციატივა მინიმალური ხელფასის შესახებ, აღნიშნა რა, რომ ამან შესაძლოა დასაქმებულთა მნიშვნელოვანი ნაწილი უმუშევარი დატოვოს, თუმცა ოპონენტები ამაზე პასუხისმგებლობას არ იღებენ.