ბრიუსელში საქართველოსთვის მნიშვნელოვანი ახალი პროექტი იწყება. კოალიცია „ძლიერი საქართველო - ლელოს“ ერთ-ერთი ლიდერის, სალომე სამადაშვილის ინფორმაციით, ბრიუსელში მდებარე ისტორიული შენობა, Aegidium-ი, „ხაზარაძეების ფონდმა“ შეიძინა.

სამადაშვილის თქმით, აღნიშნულ სასახლეში „საქართველოს სახლი“ დაფუძნდება. მისი განცხადებით, ეს სივრცე ევროპის დედაქალაქში საქართველოს წარმომადგენლობითი ფუნქციის გაძლიერებას ემსახურება.

სალომე სამადაშვილმა სოციალურ ქსელში გამოქვეყნებულ პოსტში მადლობა გადაუხადა ბელგიელ არქიტექტორს, ანდერს ბიოლკს. არქიტექტორი, რომელიც წლების წინ საქართველოს საელჩოსთვის შენობის შერჩევაში მონაწილეობდა, ამჯერად „ხაზარაძეების ფონდს“ Aegidium-ის მოპოვებაში დაეხმარა.

3 ფოტო — დააჭირე გასადიდებლად

„დარწმუნებული ვარ, ქართველი ხალხის ბრძოლით, ძალიან მალე მოვა დრო, როდესაც რეჟიმისგან გათავისუფლებული საქართველო ევროკავშირში გაწევრიანებას იზეიმებს, როგორც საქართველოს საელჩოს შენობაში, ისე ამ გასაოცარ სასახლეში, სადაც ევროპაში საქართველოს სახლი ფუძნდება“, — წერს სამადაშვილი.

პოლიტიკოსმა ხაზი გაუსვა საკუთარ პოზიციას ხელისუფლების მიმართ და აღნიშნა, რომ მიმდინარე პროცესები ქვეყნის ევროპული კურსის განმტკიცებისკენაა მიმართული. მისი თქმით, აუცილებელია ეროვნული თავმოყვარეობის დაბრუნება, რათა საქართველომ ევროპულ პლატფორმაზე საკუთარი ინტერესები, მათ შორის მშვიდობისა და კეთილდღეობის საკითხები, წარმატებით დაიცვას.

სამადაშვილის შეფასებით, დღევანდელი პოლიტიკური რეალობა და ხელისუფლების ქმედებები ქვეყნის იმიჯისთვის დამაზიანებელია. შესაბამისად, ახალი პროექტის განხორციელება, მისი აზრით, არის ნაბიჯი იმისკენ, რომ საქართველომ საერთაშორისო ასპარეზზე ღირსეული ადგილი დაიკავოს.