იმერეთის რეგიონში მომხდარი სასტიკი თავდასხმის შედეგად სამი ქალი მძიმე დაზიანებებით საავადმყოფოშია გადაყვანილი. საქართველოს შინაგან საქმეთა სამინისტროს ინფორმაციით, სამართალდამცველებმა ბრალდებული, რომელიც წარსულში ნასამართლევია, უკვე დააკავეს.

გამოძიების ვერსიით, ინციდენტი ოჯახური კონფლიქტის დროს მოხდა. ნასვამ მდგომარეობაში მყოფმა მამაკაცმა ცივი იარაღის გამოყენებით რამდენიმე ჭრილობა მიაყენა საკუთარ დედას, მეუღლესა და მეუღლის მეგობარს.

„ბრალდებული პოლიციამ ცხელ კვალზე დააკავა. სამართალდამცველებმა დანაშაულის ჩადენის იარაღი — დანა, ნივთმტკიცებად ამოიღეს“, — აცხადებენ უწყებაში.

ცნობილია, რომ დაკავებული პირი წარსულშიც იყო ნასამართლევი და პირობითი მსჯავრის ქვეშ იმყოფებოდა. ამჟამად გამოძიება სისხლის სამართლის კოდექსის 11-19-109-ე მუხლით მიმდინარეობს, რაც ოჯახის წევრებისა და სხვა პირების მიმართ დამამძიმებელ გარემოებებში განზრახ მკვლელობის მცდელობას გულისხმობს.

3 ფოტო — დააჭირე გასადიდებლად

დანაშაული 20 წლამდე ან უვადო თავისუფლების აღკვეთას ითვალისწინებს. დაჭრილი ქალები ამ დრომდე შესაბამის სამედიცინო დაწესებულებებში რჩებიან, სადაც მათ საჭირო დახმარებას უწევენ.