საქართველოს პარლამენტის თავმჯდომარე შალვა პაპუაშვილი უცხოური სპეცსამსახურების წარმომადგენლებს მოუწოდებს, შეწყვიტონ საქართველოში სადაზვერვო საქმიანობა. მისი თქმით, ქვეყანაში არცერთი უცხოური სახელმწიფოს დაზვერვას ადგილი არ აქვს.

„არ არსებობს არც მეგობრული და არც მტრული დაზვერვა. ყველამ უნდა შეწყვიტოს სადაზვერვო საქმიანობა და ჯაშუშობა“, — განაცხადა პაპუაშვილმა ჟურნალისტებთან საუბრისას.

პარლამენტის თავმჯდომარის განმარტებით, ქართული სპეცსამსახურები სრულად ფლობენ რესურსს, რათა ქვეყნის ტერიტორიაზე ნებისმიერი სადაზვერვო აქტივობა გამოავლინონ. მან ხაზგასმით აღნიშნა, რომ ნებისმიერმა უცხო ქვეყანამ, რომელიც საქართველოს ნაწილი არ არის, ეს რეალობა უნდა გაითვალისწინოს.

პაპუაშვილის განცხადება მოჰყვა საერთაშორისო მედიის, კერძოდ Intelligence Online-ის პუბლიკაციას, რომლის მიხედვითაც, საფრანგეთის საგარეო დაზვერვამ (DGSE) მაისში თბილისიდან თავისი თანამშრომლები სასწრაფოდ გაიწვია. მედიის ცნობით, ეს გადაწყვეტილება მას შემდეგ მიიღეს, რაც ქართულმა მხარემ სავარაუდო ჯაშუშური ქსელი გამოავლინა.

არსებული ინფორმაციით, საქმე ეხება ჰოლდინგ „ქართუს“ ყოფილ პრესსპიკერ გიორგი უძილაურს, რომელიც სახელმწიფო უსაფრთხოების სამსახურმა მაისის დასაწყისში დააკავა. თუმცა, ხელისუფლებას ოფიციალურად არ დაუსახელებია ის კონკრეტული ქვეყანა, რომლის სასარგებლოდაც, გამოძიების ვერსიით, დაკავებული ინფორმაციას აგროვებდა. მიუხედავად ამისა, პროსახელისუფლებო მედიასაშუალებები და პოლიტიკოსები ბოლო პერიოდში არაერთხელ მიანიშნებდნენ საფრანგეთზე.

Intelligence Online-ის ინფორმაციით, ამ ფაქტმა თბილისსა და პარიზს შორის ურთიერთობები დაძაბა. გამოცემა ასევე ამტკიცებს, რომ უძილაურის დაკავების შემდეგ, ქართულმა მხარემ დასავლელ პარტნიორებს ქვეყანაში მოქმედი აგენტების გაწვევა მოსთხოვა და წინააღმდეგ შემთხვევაში მათი ვინაობის გამჟღავნებით დაიმუქრა.

3 ფოტო — დააჭირე გასადიდებლად

თავად შალვა პაპუაშვილმა აღნიშნა, რომ მსგავსი ფაქტები ორმხრივ ურთიერთობებს ვერ გააუმჯობესებს. მანვე დასძინა, რომ მისთვის უცნობია, რამდენად სანდოა მედიაში გავრცელებული ინფორმაციის დეტალები. ოფიციალური პარიზი აღნიშნულ ბრალდებებსა და ცნობებს საჯაროდ არ გამოხმაურებია.