ვლადიმირ პუტინის განცხადებით, რუსეთის ფედერაცია უკრაინის ინფრასტრუქტურაზე მიმართულ სამხედრო დარტყმებს კიდევ უფრო გააძლიერებს. რუსეთის ლიდერმა აღნიშნული გადაწყვეტილება რუს სამხედროებთან გამართულ შეხვედრაზე გააჟღერა და მას „საპასუხო ზომა“ უწოდა.

პუტინის თქმით, აღნიშნული ნაბიჯის მიზანი უკრაინისთვის რუსულ ობიექტებზე თავდასხმის „სურვილის დაკარგვაა“. კრემლის ლიდერი ამტკიცებს, რომ რუსეთი ვალდებულია, შესაბამისი რეაგირება მოახდინოს იმ ქმედებებზე, რასაც უკრაინული მხარე ახორციელებს.

რუსეთის პრეზიდენტმა ასევე ისაუბრა უკრაინის მიერ რუსეთის ეკონომიკაზე მიყენებულ ზიანზე. პუტინის შეფასებით, მიუხედავად იმისა, რომ ზარალი არსებობს, ის კრიტიკულ ნიშნულს არ აღწევს და რუსული ეკონომიკა სწრაფად აღდგენას შეძლებს.

3 ფოტო — დააჭირე გასადიდებლად

ამ განცხადებას წინ უძღოდა უკრაინის მხრიდან რუსეთის ტერიტორიაზე დრონებისა და შორი მოქმედების იარაღის გამოყენებით განხორციელებული გახშირებული შეტევები. პარალელურად, არსებობს დაძაბულობა რეგიონში სარაკეტო საფრთხეებთან დაკავშირებით.

უკრაინის საჰაერო ძალები მოსახლეობას აფრთხილებენ, რომ არსებობს „კაპუსტინ იარის“ პოლიგონიდან ბალისტიკური რაკეტების, მათ შორის „ორეშნიკის“ ტიპის შეიარაღების გაშვების საფრთხე. სამხედროები მოქალაქეებს მოუწოდებენ, საჰაერო განგაშის სიგნალებს განსაკუთრებული სიფრთხილით მოეკიდონ და უსაფრთხოების წესები ზედმიწევნით დაიცვან.