საქართველოს სოფლის მეურნეობის სამეცნიერო-კვლევითი ცენტრის წარმომადგენელმა, გიორგი ღამბაშიძემ, ჩინეთის ქალაქ ნანჯინში გამართულ ნიადაგმცოდნეთა 23-ე მსოფლიო კონგრესზე (World Congress of Soil Science) სამეცნიერო მოხსენება წარადგინა. ღამბაშიძე, რომელიც ცენტრის ნიადაგის ნაყოფიერების კვლევის სამსახურის ლაბორატორიას ხელმძღვანელობს, საერთაშორისო ფორუმზე ქართული კვლევების შედეგებზე საუბრობდა.

ნიადაგმცოდნეთა მსოფლიო კონგრესი დარგის ყველაზე მასშტაბური და პრესტიჟული ღონისძიებაა. მას ნიადაგმცოდნეთა საერთაშორისო საზოგადოება (IUSS) და ჩინეთის ნიადაგმცოდნეთა საზოგადოება (SSSC) მასპინძლობდნენ. ფორუმი ოთხ წელიწადში ერთხელ ტარდება და მსოფლიოს წამყვანი უნივერსიტეტებისა და კვლევითი ინსტიტუტების მეცნიერებს აერთიანებს.

3 ფოტო — დააჭირე გასადიდებლად

გიორგი ღამბაშიძის მოხსენება მოიცავდა ნიადაგის ნაყოფიერების ამაღლების, მდგრადი მიწათსარგებლობისა და კლიმატის ცვლილებასთან ადაპტაციის პრაქტიკულ საკითხებს. ეს კვლევები უშუალოდ სოფლის მეურნეობის სამეცნიერო-კვლევითი ცენტრის ლაბორატორიაშია განხორციელებული.

წელს კონგრესის მთავარი თემა „ნიადაგი და კაცობრიობის საერთო მომავალი“ იყო. დისკუსიები ფოკუსირებული იყო ისეთ გლობალურ გამოწვევებზე, როგორიცაა სასურსათო უსაფრთხოება, ნიადაგის რესურსების დაცვა და მდგრადი აგროკულტურის განვითარება.

საქართველოს სოფლის მეურნეობის სამეცნიერო-კვლევითი ცენტრისთვის ეს კონგრესზე მონაწილეობის უკვე მესამე შემთხვევაა. დარგის ექსპერტების შეფასებით, ეს ფაქტი ცენტრში ჩატარებული სამეცნიერო მუშაობის მაღალ სტანდარტსა და საერთაშორისო სამეცნიერო წრეებში არსებულ აღიარებაზე მიუთითებს.