2026 წლის მაისში რუსეთმა ნედლი ნავთობის ექსპორტში რეკორდი დაამყარა. სააგენტო Bloomberg-ის მიერ ტანკერების გადაზიდვების მონაცემებზე დაყრდნობით ჩატარებული კვლევა აჩვენებს, რომ რუსული ნავთობის გადმოტვირთვის საშუალო მაჩვენებელმა დღე-ღამეში 3,46 მილიონი ბარელი შეადგინა.

ეს მაჩვენებელი 120 ათასი ბარელით აღემატება 2025 წლის მონაცემებს და სჭარბობს 2022-2024 წლების პერიოდის საშუალო წლიურ მაჩვენებელსაც. ანალიტიკოსების შეფასებით, ექსპორტის ამგვარი ზრდა პირდაპირ კავშირშია უკრაინის თავდასხმებთან რუსეთის ნავთობგადამამუშავებელ ქარხნებზე.

Reuters-ის ინფორმაციით, ცენტრალურ რუსეთში მდებარე თითქმის ყველა მსხვილმა საწარმომ დრონების დარტყმების შემდეგ წარმოების შეწყვეტა ან მკვეთრი შემცირება განიცადა. შედეგად, ნავთობკომპანიებს გაურთულდათ ნედლეულის გადამუშავება და ისინი იძულებულნი გახდნენ, ნავთობი ნედლი სახით გაეტანათ საზღვარგარეთ.

ამჟამად ზღვაში ტანკერებზე დატვირთულია 124 მილიონი ბარელი რუსული ნავთობი. მონიტორინგის მონაცემებით, ეს მოცულობა მუდმივ მოძრაობაშია და გაჩერებული ტანკერების რაოდენობა მინიმალურია.

რუსული ნავთობის მოთხოვნა განსაკუთრებით გაიზარდა ინდოეთში, რომელმაც მაისში შესყიდვები თებერვლის მაჩვენებელთან შედარებით 63%-ით გაზარდა. ეს ტენდენცია აშშ-ის მხრიდან დაწესებული შეზღუდვების გარკვეული შემსუბუქების ფონზე მიმდინარეობს.

გლობალური ბაზარზე ნავთობის ფასების ზრდამ და ახლო აღმოსავლეთში მიმდინარე კონფლიქტმა რუსეთის შემოსავლები მნიშვნელოვნად გაზარდა. თუ 2026 წლის დასაწყისში ქვეყანა ნავთობის გაყიდვიდან კვირაში 1-1,2 მილიარდ დოლარს იღებდა, მაისში ეს მაჩვენებელი 2-2,5 მილიარდ დოლარამდე გაიზარდა. ეს რუსეთის უკრაინაში სრულმასშტაბიანი შეჭრის შემდეგ დაფიქსირებული ყველაზე მაღალი მაჩვენებელია.