რუსეთის ფედერაციის რამდენიმე რეგიონი უკრაინული უპილოტო საფრენი აპარატების მასირებული თავდასხმის სამიზნე გახდა. ყველაზე მძიმე ვითარება ტულის ოლქში დაფიქსირდა, სადაც ნოვომოსკოვსკში მდებარე სამრეწველო საწარმოს, ადგილობრივი მონიტორინგის არხების ცნობით, ქიმიურ ქარხანას ცეცხლი გაუჩნდა.

ტულის ოლქის გუბერნატორმა დმიტრი მილიაევმა დაადასტურა, რომ საჰაერო თავდასხმის მოგერიებისას ჩამოგდებული დრონების ნამსხვრევები საწარმოს ტერიტორიაზე ჩამოვარდა. ამ დროისთვის შემთხვევის ადგილზე საგანგებო სიტუაციების სამსახურები მუშაობენ და მიმდინარეობს ზიანის მასშტაბების დადგენა. რეგიონში კვლავ მოქმედებს ოპერატიული შტაბი, რადგან დრონების თავდასხმის საფრთხე კვლავ მაღალია.

პარალელურად, ინციდენტები დაფიქსირდა რუსეთის სხვა ქალაქებშიც. მოსკოვის მერმა სერგეი სობიანინმა განაცხადა, რომ დედაქალაქის მიმართულებით მომავალი ოთხი უპილოტო საფრენი აპარატი ჩამოაგდეს. მიუხედავად იმისა, რომ მსხვერპლის შესახებ ოფიციალური მონაცემები არ ვრცელდება, დრონების ფრაგმენტების ჩამოვარდნის ადგილებში შესაბამისი სამსახურები არიან მობილიზებულნი.

3 ფოტო — დააჭირე გასადიდებლად

თავდასხმები განხორციელდა სმოლენსკის ოლქზეც. არსებული ინფორმაციით, სამიზნეს ქალაქ ვიაზმაში მდებარე სარკინიგზო ინფრასტრუქტურა წარმოადგენდა. ამავდროულად, ორიოლში დრონების შემოტევის შედეგად მრავალსართულიან საცხოვრებელ კორპუსს ცეცხლი გაუჩნდა, რაც მიუთითებს იმაზე, რომ იერიშები რუსეთის სიღრმეში მდებარე სტრატეგიულ ობიექტებზეა მიმართული.

სიტუაცია რუსეთის საჰაერო სივრცეში რჩება დაძაბული. უკრაინული მხარე ოფიციალურად არ აკეთებს დეტალურ კომენტარებს თითოეულ ეპიზოდზე, თუმცა მსგავსი ტიპის ოპერაციები რუსეთის სამხედრო და სამრეწველო პოტენციალის შესუსტების სტრატეგიის ნაწილია.