თბილისის ყოვლადწმინდა სამების სახელობის საპატრიარქო ტაძრის ტერიტორია ახალი მწვანე ნარგავებით გამდიდრდა. საქართველოს კათოლიკოს-პატრიარქის, უწმინდესი და უნეტარესი ილია II-ის ხსოვნისადმი მიძღვნილი ღონისძიების ფარგლებში, ტაძრის ეზოში ზეთისხილის ბაღი გაშენდა.

გამწვანების აქცია საქართველოს საპატრიარქოს ფონდის „გაამწვანე საქართველო“ ინიციატივით ჩატარდა. ღონისძიებაში გარემოს დაცვისა და სოფლის მეურნეობის მინისტრი დავით სონღულაშვილი, სამინისტროს ხელმძღვანელი პირები და სასულიერო პირები მონაწილეობდნენ.

სულ დარგეს 150 ძირი ზეთისხილის ნერგი. აქციაში მონაწილეობა მიიღეს გორისა და ატენის ეპარქიის მიტროპოლიტმა, მეუფე ანდრია გვაზავამ, ასევე მინისტრის პირველმა მოადგილემ ნინო თანდილაშვილმა და მინისტრის მოადგილემ გიორგი წკრიალაშვილმა.

3 ფოტო — დააჭირე გასადიდებლად

მინისტრის შეფასება და ვიზიტი კოლეჯში

დავით სონღულაშვილმა აღნიშნა, რომ სამების საკათედრო ტაძრის ეზოში მსგავს ღონისძიებაში მონაწილეობა მისთვის განსაკუთრებული პატივი და პასუხისმგებლობაა. მან მადლობა გადაუხადა ყველა იმ პირს, ვინც პროექტის დაგეგმვასა და განხორციელებაში მონაწილეობდა.

გამწვანების აქციის პარალელურად, მინისტრმა დაათვალიერა ტაძრის ეზოში მდებარე დეკორატიული მებაღეობის საზოგადოებრივი კოლეჯი. დავით სონღულაშვილი ადგილზე გაეცნო საგანმანათლებლო დაწესებულების საქმიანობას და მოისმინა დეტალური ინფორმაცია მათი სამომავლო გეგმების შესახებ.