სამცხე-ჯავახეთი გასტრონომიული თავგადასავლების ეპიცენტრად იქცა. რაბათის ციხის მიმდებარე ტერიტორიაზე ყველაზე მასშტაბური გასტრონომიული ფესტივალი, „გემოფესტი“ გაიხსნა, რომელიც რეგიონის კულტურულ და კულინარიულ პოტენციალს წარმოაჩენს.

ღონისძიებაზე დილიდან ხალხმრავლობაა. ვიზიტორებს შესაძლებლობა აქვთ, დააგემოვნონ როგორც ტრადიციული მესხური კერძები, ისე მათი თანამედროვე, ექსპერიმენტული ვარიაციები. კულინარიულ სიახლეებზე თბილისიდან მოწვეული ცნობილი შეფ-მზარეულები ზრუნავენ.

მეტი ვიდრე ფესტივალი

„გემოფესტი“ მხოლოდ კერძების დაგემოვნებას არ გულისხმობს. ფესტივალის ფარგლებში მოწყობილია ადგილობრივ მეწარმეთა გამოფენა-გაყიდვა. საკუთარი ნაწარმი 13-მა ადგილობრივმა მწარმოებელმა წარმოადგინა, რაც რეგიონული ბიზნესის მხარდაჭერას უწყობს ხელს.

ორგანიზატორების თქმით, ღონისძიების მთავარი მიზანი მესხური სამზარეულოს პოპულარიზაცია და რეგიონში ვიზიტორთა ნაკადის ზრდაა. ფესტივალზე ასევე მოწყობილია სპეციალური აგრო ზონა და გასართობი სივრცე ბავშვებისთვის.

საერთაშორისო ინტერესი

ქართული გასტრონომიის მიმართ ინტერესი უცხოელი ტურისტების მხრიდან განსაკუთრებით მაღალია. ფესტივალის ორგანიზატორები აღნიშნავენ, რომ მრავალფეროვანი მენიუ და რეგიონის უნიკალური ბუნება სტუმრებისთვის მიმზიდველ გარემოს ქმნის.

აღსანიშნავია, რომ სამცხე-ჯავახეთში ეს მასშტაბური ღონისძიება წელს უკვე მეორედ იმართება. ფესტივალი ორდღიანია და სტუმრებს ხვალინდელი დღის განმავლობაშიც უმასპინძლებს.