საქართველოს პარლამენტის თავმჯდომარე შალვა პაპუაშვილი ოპოზიციური „ალიანსის“ ირგვლივ განვითარებულ მოვლენებს ეხმაურება. მისი თქმით, პოლიტიკური გაერთიანების მოსალოდნელი დაშლა არ არის იდეოლოგიური დაპირისპირების შედეგი, არამედ წარმოადგენს „გარედან დაკვეთილ“ ტაქტიკურ გადანაწილებას.
პაპუაშვილის განცხადებით, საზოგადოებამ მსგავსი პოლიტიკური სცენარები წარსულში არაერთხელ იხილა. პარლამენტის თავმჯდომარის შეფასებით, „ალიანსმა“ თავისი არსებობით მხოლოდ ის დაადასტურა, რომ „ყოფილი ნაცი“ არ არსებობს და აღნიშნული პოლიტიკური ძალები იდეოლოგიურად კვლავ ერთნი არიან.
„ჩვენ ვნახეთ, რომ „ნაცები“ ისევ ერთად გაერთიანდნენ. როდესაც ამ ტერმინს ვიყენებ, არ ვგულისხმობ მხოლოდ პარტიულ კუთვნილებას, არამედ იდეოლოგიას. ეს არის ანტიქართული და ანტიდემოკრატიული იდეოლოგია, რომელიც აერთიანებს ამ ადამიანებს“, — განაცხადა შალვა პაპუაშვილმა.
პარლამენტის თავმჯდომარე მიიჩნევს, რომ „ალიანსმა“ თავისი „საქმე გააკეთა“ იმით, რომ საზოგადოებას ნათლად დაანახა მათი ერთიანი სახე. მისი თქმით, ახლა მიმდინარეობს პროცესი, რომლის ფარგლებშიც ცდილობენ ეს „ტოქსიკური“ გაერთიანება დაშალონ და სხვადასხვა ჯგუფებზე გადაანაწილონ.
„როგორ დაიშლებიან და ვინ რომელ ფლანგზე წავა, არის ის ტაქტიკური გადანაწილება, რომელიც არაერთხელ ჩაატარეს გარედან დაკვეთით საქართველოში. ამას ქართველი ხალხი უკვე აღარ იჯერებს“, — აღნიშნა პაპუაშვილმა.
პაპუაშვილის განცხადებით, მადლობაც კი ეკუთვნით იმ ადამიანებს, ვინც ეს ძალები ერთ ჭერქვეშ გააერთიანა, რადგან ამან ამომრჩეველს კიდევ ერთხელ დაანახა მათი საერთო მიზნები და იდეოლოგიური მსგავსება.
დისკუსია
0 კომენტარი
ჯერ კომენტარი არ არის — იყავი პირველი.