პარლამენტის თავმჯდომარემ შალვა პაპუაშვილმა ტელეკომპანია „იმედის“ ეთერში ქვეყნის საგარეო პოლიტიკურ კურსსა და რეგიონულ გამოწვევებზე ისაუბრა. მისი განცხადებით, საქართველოს გეოგრაფიული მდებარეობა არის ფაქტორი, რომლის უგულებელყოფა შეუძლებელია.

„გეოგრაფია არ შეიცვლება, ჯერჯერობით გეოგრაფიასთან ომის არავის მოუგია“, — განაცხადა პაპუაშვილმა.

ისტორიული გამოცდილება და „შინაგანი ფორმულა“

პარლამენტის თავმჯდომარემ ხაზი გაუსვა საქართველოს ისტორიულ მდგრადობას. მისი თქმით, 3000-წლიანი სახელმწიფოებრიობის ისტორია ადასტურებს, რომ ქვეყანას გამომუშავებული აქვს ე.წ. „შინაგანი ფორმულა“. ეს მექანიზმი საქართველოს რეგიონში არსებული პოლიტიკური ქარიშხლების გადალახვაში ეხმარება.

„ის ტურბულენტური რეგიონი, რომელშიც ჩვენ ისტორიულად ვიყავით, დღესაც ასეთია და ალბათ ასეთივე იქნება მომავალშიც“, — აღნიშნა მან.

კრიტიკა ოპონენტების მისამართით

პაპუაშვილმა უპასუხა ოპოზიციის ბრალდებებს იმის შესახებ, თითქოს საქართველოს საერთაშორისო ასპარეზზე სხვა ქვეყნებით ანაცვლებენ. პარლამენტის თავმჯდომარის შეფასებით, მსგავსი მსჯელობა უვიცობის შედეგია.

მან მაგალითად მოიყვანა ევროპარლამენტში მომხდარი შემთხვევა, როდესაც ჟურნალისტებმა რუკაზე ირანის ადგილმდებარეობის მითითება ვერ შეძლეს. პაპუაშვილის თქმით, გლობალური პოლიტიკური საკითხების გადაწყვეტა ასეთი კვალიფიკაციის მქონე ადამიანების მხრიდან საფრთხის შემცველია.

ევროპული გამოცდილება

საქართველოს პარლამენტის თავმჯდომარემ ევროპის როლზეც ისაუბრა. მისი თქმით, ევროპულმა ქვეყნებმა ტურბულენტურ პერიოდებში არაერთხელ „წაიტეხეს ცხვირი“.

„ხან თვითონ იყო ინიციატორი, ხან მსხვერპლი, მაგრამ ბევრჯერ ვერ შეძლო საკუთარი ხალხისთვის აერიდებინა სხვადასხვა სახის ომი და უბედურება“, — განაცხადა შალვა პაპუაშვილმა.