ბათუმის რაიონ გონიოში, საქართველოსა და თურქეთის საზღვართან, მასშტაბური ტურისტული პროექტის პრეზენტაცია გაიმართა. „Sky Castle“ წარმოადგენს 5-ვარსკვლავიან სასტუმრო-ციხესიმაგრეს, რომელიც, ექსპერტების შეფასებით, ქვეყნის ტურისტულ სექტორს ახალ საფეხურზე აიყვანს.

პროექტის დეველოპერი ქართულ-ისრაელური ჰოლდინგი „European Village“-ია. კომპანია, რომელიც „Forbes Georgia“-ს მიერ ორჯერ დასახელდა ქვეყნის ტოპ 10 ბრენდს შორის, მშენებლობას გონიოს მთის წვერზე გეგმავს.

არქიტექტურული კონცეფცია 1121 წლის დიდგორის ბრძოლის ისტორიულ მნიშვნელობას ეფუძნება. დეველოპერების თქმით, შენობა შუა საუკუნეების ციხესიმაგრის სტილში შესრულდება, რაც სიმბოლურად დავით აღმაშენებლისა და ევროპელი ჯვაროსნების კავშირს გაუსვამს ხაზს.

„ჩვენ ვაშენებთ Sky Castle-ს, როგორც ცოცხალ ხიდს ეპოქებსა და კულტურებს შორის. პროექტის ფარგლებში ყოველწლიურად ჩატარდება ისტორიული რეკონსტრუქციის საერთაშორისო ფესტივალი რაინდული ტურნირებითა და მშვილდოსანთა შეჯიბრებებით“, – განაცხადა ჰოლდინგის გენერალურმა დირექტორმა არჩილ პარტენაძემ.

„ამ ტიპის ინვესტიციები ისრაელის კომპანიების მხრიდან ჩვენს პარტნიორებთან ერთად, ორი ერის მყარი ურთიერთობის რეალური დასტურია“, – აღნიშნა პრეზენტაციაზე ისრაელის ელჩმა საქართველოში ვალიდ აბუ ხაიამ.

სასტუმრო კომპლექსი ორი კოშკისგან შედგება (14 და 16 სართული) და ჯამში 430 ნომერს მოიცავს. „Sky Castle“ „Wyndham Grand Batumi Gonio“-ს ელიტური ქსელის ნაწილია. ფრანშიზა გლობალურმა გიგანტმა „Wyndham Hotels & Resorts“-მა უზრუნველყო.

პროექტის საინჟინრო ინფრასტრუქტურა მოიცავს სპეციალურ მაღალსიჩქარიან ლიფტს, რომელიც სტუმრებს პირდაპირ კეთილმოწყობილ სანაპიროზე ჩაიყვანს. სასტუმროს სტუმრებს წვდომა ექნებათ კომპლექსის საერთო ინფრასტრუქტურაზე, რომელიც 100-მდე ობიექტს აერთიანებს, მათ შორის 12 რესტორანს, SPA-ცენტრებსა და სარეაბილიტაციო კლინიკას.

მთლიანი კომპლექსის მართვას სასტუმროების მართვის გლობალური ლიდერი „Aimbridge Hospitality“ განახორციელებს, რაც მომსახურების საერთაშორისო სტანდარტების დაცვას უზრუნველყოფს.

საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ შოთა ბერეკაშვილმა ხაზი გაუსვა სახელმწიფოს მხარდაჭერას მსგავსი მსხვილი საინვესტიციო პროექტების მიმართ, რაც, მისი თქმით, მომდევნო ხუთ წელიწადში ტურისტული შემოსავლების გაორმაგების წინაპირობაა.