საქართველოს რკინიგზამ ზაფხულის ტურისტული სეზონისთვის მზადება დაიწყო. ივნისის შუა რიცხვებიდან თბილისსა და ბათუმს შორის დამატებითი სამგზავრო შემადგენლობები იმოძრავებს. გადაწყვეტილება მგზავრთა მკვეთრად გაზრდილმა ნაკადმა განაპირობა.
16 ივნისიდან 30 სექტემბრის ჩათვლით, დაინიშნა ახალი ღამის რეისი. მატარებელი თბილისიდან 00:30 საათზე გავა და ბათუმში 05:42 საათზე ჩავა. უკუმიმართულებით, ბათუმიდან მატარებელი 00:35 საათზე დაიძვრება და დედაქალაქში 05:34 საათზე იქნება.
დღის დამატებითი რეისები
გარდა ღამის მატარებლებისა, 16 ივნისიდან 9 ოქტომბრამდე დამატებითი დღის რეისიც დაინიშნა. მგზავრებს თბილისიდან ბათუმის მიმართულებით 10:10 საათზე გასვლა შეეძლებათ, სადაც ისინი 15:22 საათზე ჩავლენ. ბათუმიდან მატარებელი 18:30 საათზე გამოემგზავრება და თბილისში 23:29 საათზე დაბრუნდება.
საქართველოს რკინიგზის ინფორმაციით, ბილეთების შეძენა შესაძლებელია როგორც კომპანიის ოფიციალურ ვებგვერდზე, ასევე სადგურების სალაროებში, სწრაფი გადახდის აპარატებსა და მობილურ აპლიკაციებში.
არსებული განრიგი
აღსანიშნავია, რომ დამატებითი რეისების დანიშვნამდე თბილისი-ბათუმის მიმართულებით მატარებლები შემდეგი გრაფიკით მოძრაობენ:
- თბილისიდან: 08:00 და 17:10 საათზე (ბათუმში ჩასვლა შესაბამისად 13:12 და 22:22)
- ბათუმიდან: 08:00 და 16:50 საათზე (თბილისში ჩასვლა შესაბამისად 12:59 და 21:49)
საქართველოს რკინიგზა მოუწოდებს მგზავრებს, ბილეთები წინასწარ დაჯავშნონ, რათა თავიდან აიცილონ სეზონური გადატვირთულობით გამოწვეული შეფერხებები.
დისკუსია
0 კომენტარი
ჯერ კომენტარი არ არის — იყავი პირველი.