შინაგან საქმეთა სამინისტროს თბილისის პოლიციის დეპარტამენტის არასრულწლოვანთა საქმეთა მთავარმა სამმართველომ მასშტაბური საგამოძიებო მოქმედებების შედეგად 6 არასრულწლოვანი დააკავა. მათ ბრალად ედებათ ჯგუფური ძარცვა, ქურდობა და თაღლითობა.

გამოძიების ინფორმაციით, დაკავებულები თბილისში მდებარე სხვადასხვა სააფთიაქო და სასურსათო მაღაზიათა ქსელებს სისტემატურად ძარცვავდნენ. მოზარდები წინასწარი შეთანხმებით მოქმედებდნენ და გატაცებული პროდუქციით შემთხვევის ადგილიდან მიმალვას ახერხებდნენ.

3 ფოტო — დააჭირე გასადიდებლად

სამართალდამცველების ცნობით, დაკავებულთაგან 4 არასრულწლოვანი წარსულში უკვე ნასამართლევია და ისინი ამჟამად პირობითი მსჯავრის ქვეშ იმყოფებოდნენ. გარდა მაღაზიების ძარცვისა, ერთ-ერთ მათგანს ბრალად ედება მოქალაქის კუთვნილი მობილური ტელეფონის თაღლითური გზით დაუფლება.

დანაშაულებრივი ქმედებების შედეგად, დაზარალებულ სავაჭრო ობიექტებს ჯამში 30 000 ლარამდე ფინანსური ზარალი მიადგათ. საქმის გამოსაძიებლად პოლიციამ ათეულობით მაღაზიის სათვალთვალო კამერების ჩანაწერები შეისწავლა, რაც ბრალდებულების დანაშაულებრივი სქემის დასადასტურებლად საკმარისი აღმოჩნდა.

ამჟამად გამოძიება სისხლის სამართლის კოდექსის 177-ე (ქურდობა), 178-ე (ძარცვა) და 180-ე (თაღლითობა) მუხლებით მიმდინარეობს. კანონმდებლობის თანახმად, აღნიშნული დანაშაულები 8 წლამდე თავისუფლების აღკვეთას ითვალისწინებს.