თბილისში, ილია ჭავჭავაძის გამზირზე მომხდარი ქურდობის ფაქტზე შინაგან საქმეთა სამინისტროს ვაკე-საბურთალოს მთავარი სამმართველოს თანამშრომლებმა ორი პირი დააკავეს. საგამოძიებო მოქმედებების შედეგად დადგინდა, რომ ბრალდებულებმა რამდენიმე სავაჭრო ობიექტში უკანონოდ შეაღწიეს.

გამოძიების ინფორმაციით, დაკავებულებმა მაღაზიებიდან ჯამში 2 000 ლარამდე თანხა მიითვისეს, რის შემდეგაც შემთხვევის ადგილიდან მიიმალნენ. სამართალდამცველებმა ოპერატიული ღონისძიებების შედეგად ორივე პირი მალევე დაადგინეს და დააკავეს.

3 ფოტო — დააჭირე გასადიდებლად

გარკვეულია, რომ დაკავებულთაგან ერთი არასრულწლოვანია, რომელიც წარსულში ნასამართლევი იყო და ამჟამად პირობითი მსჯავრის ქვეშ იმყოფებოდა.

შინაგან საქმეთა სამინისტროს ცნობით, საქმეზე გამოძიება საქართველოს სისხლის სამართლის კოდექსის 177-ე მუხლით მიმდინარეობს. აღნიშნული მუხლი დანაშაულის დამტკიცების შემთხვევაში 7 წლამდე ვადით თავისუფლების აღკვეთას ითვალისწინებს.