აშშ-ის პრეზიდენტმა დონალდ ტრამპმა განაცხადა, რომ შეერთებული შტატები ირანის კუნძულ ხარქსა და მის ნავთობინფრასტრუქტურაზე სრულ კონტროლს დაამყარებს. განცხადება პრეზიდენტმა სოციალურ ქსელ TruthSocial-ზე მას შემდეგ გაავრცელა, რაც რეგიონში სამხედრო დაპირისპირება კიდევ უფრო გამწვავდა.

ტრამპის თქმით, ეს ნაბიჯი ირანის ნავთობისა და გაზის ბაზრებზე გავლენას მოახდენს. მან აღნიშნა, რომ ანალოგიური მიდგომა ვენესუელას შემთხვევაში უკვე გამოიყენეს, რაც, მისივე შეფასებით, ეფექტური აღმოჩნდა როგორც აშშ-ისთვის, ისე თავად ვენესუელისთვის.

კუნძული ხარქი სპარსეთის ყურეში მდებარეობს და ირანის ნავთობექსპორტის მთავარ ჰაბს წარმოადგენს. სტატისტიკური მონაცემებით, ირანის ნავთობის 90%-ზე მეტი სწორედ ამ კუნძულზე არსებული ტერმინალებიდან გადის საერთაშორისო ბაზრებზე. აღსანიშნავია, რომ თებერვალ-აპრილში კუნძულზე არსებული ობიექტები უკვე იყო სამხედრო დარტყმების სამიზნე.

ამერიკული მხარის მიერ ირანის ობიექტებზე განხორციელებულ ოპერაციებს ირანული მხარე აშშ-ის ბაზებზე დარტყმებით პასუხობს. მიუხედავად იმისა, რომ ფორმალურად ცეცხლის შეწყვეტის შეთანხმება ძალაში რჩება, ორივე მხარე ერთმანეთს პირობების დარღვევაში ადანაშაულებს.

სამხედრო დაძაბულობა ზღვაზეც იგრძნობა. 10 და 11 ივნისს აშშ-ის ძალებმა ომანის ყურეში ტანკერებზე მიიტანეს იერიში. ოფიციალური ცნობით, გემები ირანული პორტების საზღვაო ბლოკადის გარღვევას ცდილობდნენ. ინციდენტს მსხვერპლიც მოჰყვა: პალაუს დროშის ქვეშ მცურავ ტანკერ „სეტებელოზე“ განხორციელებული დარტყმის შედეგად ინდოეთის სამი მოქალაქე დაიღუპა.

აშშ-ის ცენტრალური სარდლობის განცხადებით, ტანკერზე თავდასხმა მას შემდეგ მოხდა, რაც ეკიპაჟმა სამხედროების ბრძანებების შესრულებაზე უარი განაცხადა. სარდლობა ამტკიცებს, რომ გემს ირანული ნავთობი გადაჰქონდა. ინციდენტს უკვე მოჰყვა დიპლომატიური პროტესტი ინდოეთის მხრიდან.

ირანის ხელისუფლებას ტრამპის განცხადებაზე ჯერ ოფიციალური პასუხი არ გაუცია. კუნძულზე შესაძლო სახმელეთო ოპერაციის დაწყების შესახებ კონკრეტული ვადები ან დეტალები ამ ეტაპზე დაზუსტებული არ არის.