უკრაინა ანექსირებული ყირიმის იზოლაციის სტრატეგიას აქტიურ ფაზაში გადაჰყავს. უკრაინის შეიარაღებული ძალების უპილოტო სისტემების ძალების მეთაურის, რობერტ ბროვდის, იგივე „მადიარის“ განცხადებით, ოფიციალური კიევი მიზანმიმართულად მუშაობს ნახევარკუნძულის სამხედრო და ლოჯისტიკური კავშირების გაწყვეტაზე.

Reuters-ის ცნობით, უკრაინული დრონების სისტემურმა დარტყმებმა უკვე გამოიწვია სერიოზული შეფერხებები ოკუპირებულ ტერიტორიებზე. განსაკუთრებით მწვავეა მდგომარეობა საწვავის მომარაგების მხრივ, რის გამოც საოკუპაციო ხელისუფლება იძულებული გახდა, საწვავის გაყიდვაზე მკაცრი ნორმები დაეწესებინა.

ბროვდის შეფასებით, ბოლო ერთი თვის განმავლობაში როსტოვს, მარიუპოლს, მელიტოპოლსა და ყირიმს შორის დამაკავშირებელ გზატკეცილზე სატრანსპორტო მოძრაობა 2/3-ზე მეტით შემცირდა. მეთაური პროგნოზირებს, რომ უახლოეს პერიოდში უკრაინა აღნიშნულ მარშრუტზე სრულ კონტროლს დაამყარებს.

„ჩვენ ვქმნით პირობებს, რომლებიც ყირიმში რუსი სამხედროებისა და თავდაცვის სფეროს თანამშრომლების ყოფნას უკიდურესად გაართულებს. მათთვის შეუძლებელი გახდება როგორც ნახევარკუნძულზე დარჩენა, ისე იქამდე მისასვლელი გზების უსაფრთხოდ გამოყენება“, - განმარტა „მადიარმა“.

3 ფოტო — დააჭირე გასადიდებლად

ოპერაციის წარმატებისთვის გადამწყვეტი აღმოჩნდა რუსული საჰაერო თავდაცვის სისტემების განადგურება. მიმდინარე წლის პირველ ხუთ თვეში უკრაინულმა დანაყოფებმა მოწინააღმდეგის 174 საჰაერო თავდაცვის კომპლექსი გაანადგურეს, რითაც დრონებისთვის ფართო საოპერაციო სივრცე გაიხსნა.

ბროვდი ხაზს უსვამს, რომ უკრაინის სამხედრო სტრატეგია რუსეთის სამხედრო-სამრეწველო კომპლექსსა და ნავთობის სექტორზე სისტემურ დარტყმებს ეფუძნება. მიზანი მოსკოვის ომის გაგრძელების რესურსისა და მოტივაციის შესუსტებაა.

„ჩვენ ვაღებთ კარს უზარმაზარ სივრცეებში, სადაც ომის ტკივილი უნდა იგრძნობოდეს. ეს ეხება რუსეთის ქალაქების მოსახლეობის ცნობიერებასაც“, - აღნიშნა ბროვდიმ. ამასთან, მან კატეგორიულად უარყო სამოქალაქო ობიექტებზე მიზანმიმართული თავდასხმები და დაადასტურა, რომ უკრაინა მსგავს ტაქტიკას არ მიმართავს.