ზაპოროჟიეს ატომური ელექტროსადგურის მიმდებარე ტერიტორიაზე დროებითი ზავი ამოქმედდა. გადაწყვეტილება სადგურის სასიცოცხლოდ მნიშვნელოვანი ელექტროგადამცემი ხაზების სარეაბილიტაციო სამუშაოებს უკავშირდება. ეს გადაწყვეტილება ბირთვული უსაფრთხოების სტანდარტების დაცვასა და შესაძლო კატასტროფის თავიდან აცილებას ემსახურება.

შეთანხმების მიღწევა ატომური ენერგიის საერთაშორისო სააგენტოს (IAEA) შუამავლობით გახდა შესაძლებელი. როგორც ორგანიზაციის განცხადებაშია აღნიშნული, მხარეებმა ფართომასშტაბიანი განაღმვითი სამუშაოების შემდეგ, 750 კილოვოლტიანი „დნეპროპეტროვსკაიას“ ელექტროგადამცემი ხაზის აღდგენა დაიწყეს.

აღნიშნული ხაზი ორი თვის წინ დაზიანდა, რის გამოც ევროპის უდიდესი ატომური ელექტროსადგური ერთადერთ, 330 კილოვოლტიან ხაზზე გახდა დამოკიდებული. ბოლო კვირების განმავლობაში სადგურმა რამდენჯერმე დაკარგა წვდომა ენერგიის ამ წყაროზეც, რის გამოც პერსონალი იძულებული გახდა, საავარიო დიზელის გენერატორები აემოქმედებინა.

მოლაპარაკებების რთული პროცესი

ცეცხლის შეწყვეტის შესახებ მოლაპარაკებები რამდენიმე კვირას გაგრძელდა. ოფიციალური ინფორმაციით, ეს 2025 წლის შემდეგ უკვე მეექვსე შემთხვევაა, როდესაც მხარეებმა IAEA-ს შუამავლობით დროებითი ზავის რეჟიმი შეათანხმეს. „როსატომის“ ხელმძღვანელის, ალექსეი ლიხაჩოვის განცხადებით, დიალოგი მარტის ბოლოდან მიმდინარეობდა და საკმაოდ „დელიკატური და რთული“ ხასიათი ჰქონდა.

ზავი მიმდინარე წლის 5 ივნისს, დილის 6 საათზე ამოქმედდა. წინასწარი გათვლებით, სარემონტო სამუშაოები 23 ივნისამდე გაგრძელდება. ამ პერიოდში ატომური ენერგიის საერთაშორისო სააგენტოს ექსპერტები პროცესის მიმდინარეობას ადგილზე გაუწევენ ზედამხედველობას.

შეგახსენებთ, რომ ზაპოროჟიეს ატომური ელექტროსადგური და მიმდებარე ტერიტორია 2022 წლის მარტიდან რუსული ძალების ოკუპაციის ქვეშაა. მიუხედავად იმისა, რომ სადგურს რუსეთის მიერ დანიშნული ადმინისტრაცია მართავს, ობიექტის ბირთვული უსაფრთხოების საკითხი კვლავ საერთაშორისო ყურადღების ცენტრში რჩება.