იოჰან ვოლფგანგ ფონ გოეთეს საუკუნოვანი ქარვის კოლექცია მეცნიერებისთვის მოულოდნელი აღმოჩენის წყარო გახდა. კლასიკური ვაიმარის ფონდის მფლობელობაში არსებულ 40 ნიმუშს შორის, მეცნიერებმა მწერების ნამარხები იპოვეს, რომლებიც ათეულობით მილიონი წლის განმავლობაში ფისის ტყვეობაში იყო.

იენის უნივერსიტეტის მკვლევართა ჯგუფმა, თანამედროვე ვიზუალიზაციის ტექნოლოგიების გამოყენებით, შეძლო იმ ობიექტების დეტალური შესწავლა, რომლებიც შეუიარაღებელი თვალით თითქმის არ ჩანდა. ქარვის ნიმუშები, რომლებიც არასდროს ყოფილა გაპრიალებული, ჰამბურგში, გერმანიის ელექტრონული სინქროტრონის (DESY) ლაბორატორიაში მიკროკომპიუტერული ტომოგრაფიით დაასკანირეს.

სკანირების შედეგად იდენტიფიცირდა სამი მწერი: სოკოს კოღო, შავი ბუზი და უძველესი ჭიანჭველა. განსაკუთრებული ყურადღება სწორედ ჭიანჭველამ მიიპყრო, რომელიც გადაშენებულ სახეობას †Ctenobethylus goepperti-ს მიეკუთვნება.

„ნიმუშის შესანიშნავი შენახვის პირობების წყალობით, ჩვენ შევძელით მისი ანატომიის დეტალური აღწერა, რაც აქამდე შეუძლებელი იყო“, — აცხადებს იენის უნივერსიტეტის წარმომადგენელი ბერნჰარდ ბოკი. მკვლევარებმა შეძლეს მწერის სხეულის წვრილი ბუსუსების დანახვაც კი, რაც ამ სახეობის ევოლუციის კვლევისთვის უმნიშვნელოვანესი მონაცემია.

მეცნიერებმა შექმნეს ნამარხის სრული ციფრული რეკონსტრუქცია, რომელიც უკვე ხელმისაწვდომია ონლაინ რეჟიმში. ეს 3D მოდელი საერთაშორისო სამეცნიერო საზოგადოებას მსგავსი ნამარხების იდენტიფიკაციასა და შედარებაში დაეხმარება. მკვლევარების ვარაუდით, ეს ჭიანჭველები ხეებზე ბუდობდნენ, რაც ხსნის იმ ფაქტს, თუ რატომ ხვდებიან ისინი ქარვაში ასე ხშირად.

საინტერესოა, რომ თავად გოეთეს ქარვა მეცნიერული ინტერესის საგანზე მეტად ოპტიკური თვისებების გამო აინტერესებდა. ის ქარვისგან ლინზებს ამზადებდა და მათ ფერთა თეორიის კვლევისთვის იყენებდა. მიუხედავად იმისა, რომ მის ბიბლიოთეკაში არსებობდა პუბლიკაციები ნამარხების შესახებ, მაშინდელ მეცნიერებას არ გააჩნდა იმის რესურსი, რასაც დღეს თანამედროვე ტექნოლოგიები გვთავაზობს.