მიანმარის კაჩინის რეგიონში აღმოჩენილი 100 მილიონი წლის ქარვა დინოზავრების ეპოქის ეკოსისტემის შესახებ უნიკალურ დეტალებს ამჟღავნებს. ლუდვიგ მაქსიმილიანის მიუნხენის უნივერსიტეტის (LMU) მეცნიერებმა მასში აქამდე უცნობი მწერი იდენტიფიცირეს, რომელიც თავისი ანატომიით მკვეთრად განსხვავდება თანამედროვე და გადაშენებული სახეობებისგან.

კიბორჩხალასებრი კლანჭები მწერებში

აღმოჩენილ მწერს წინა კიდურებზე დიდი, კლანჭისმაგვარი სტრუქტურები აქვს, რაც ბიოლოგიურად კიბორჩხალების ქელებს (chelae) წააგავს. მწერების სამყაროში ასეთი აგებულება უკიდურესად იშვიათია. ზოოლოგი კაროლინ ჰაუგის განმარტებით, მსგავსი სტრუქტურა მწერების მხოლოდ სამ ჯგუფში იყო ცნობილი, შესაბამისად, ეს აღმოჩენა მეოთხე შემთხვევაა ევოლუციურ ისტორიაში.

მკვლევარებმა ფინეთის ოულუსა და როსტოკის უნივერსიტეტებთან ერთად მიკრო-კომპიუტერული ტომოგრაფია გამოიყენეს. 3D გამოსახულებების დახმარებით მათ მწერის ანატომია დეტალურად შეისწავლეს და შედეგები სამეცნიერო ჟურნალ Insects-ში გამოაქვეყნეს.

K-pop ჯგუფი და მეცნიერული დასახელება

მწერს მეცნიერებმა Carcinonepa libererrantes უწოდეს. სახელი „Carcinonepa“ ბერძნული სიტყვა „კიბორჩხალასა“ და წყლის მწერების ჯგუფის, „Nepa“-ს შერწყმით მიიღეს. საინტერესოა, რომ სახეობის სახელწოდება libererrantes ცნობილი K-pop ჯგუფის, Stray Kids-ის სახელს უკავშირდება. მკვლევარების თქმით, მწერის კლანჭების პოზა ჯგუფის სავიზიტო ბარათად ქცეულ ჟესტებს მოგვაგონებს.

მტაცებელი ცარცული პერიოდის ტყეებში

კვლევის მიხედვით, მწერი ეკუთვნის „ნამდვილი წყლის მწერების“ (Nepomorpha) ჯგუფს. მიუხედავად ამისა, მისი სხეულის აგებულება მას თანამედროვე ხმელეთის მტაცებელ მწერებს, კერძოდ, Gelastocoridae-ს ოჯახს ამსგავსებს. მეცნიერები ვარაუდობენ, რომ ეს არსება ცარცული პერიოდის სანაპირო ტყეებში ცხოვრობდა.

მისი მასიური კლანჭები, სავარაუდოდ, მცირე ზომის მწერების დასაჭერად და შესაკავებლად გამოიყენებოდა. 2000-ზე მეტი სხვადასხვა სახეობის კიდურების შედარებითმა ანალიზმა დაადასტურა, რომ აღმოჩენილი მწერის კლანჭები უფრო ახლოსაა კიბორჩხალებსა და ლობსტერებთან, ვიდრე სხვა მწერებთან.