კაბო-ვერდეს ნაკრების 40 წლის მეკარე, ვოზინია, რომელიც ესპანეთთან მატჩის შემდეგ გულშემატკივრების ფავორიტი გახდა, მსოფლიო ჩემპიონატზე დედას შეხვდება. ფეხბურთელმა მატჩის შემდგომ ინტერვიუში აღნიშნა, რომ მისი ოჯახის წევრი აშშ-ში ჩასვლას ფინანსური ბარიერების გამო ვერ ახერხებდა.

ვითარებაში აშშ-ის კონგრესის დემოკრატიული ლიდერი ჰაკიმ ჯეფრისი ჩაერია. მან სახელმწიფო მდივან მარკო რუბიოსთან კონსულტაციების შემდეგ განაცხადა, რომ მეკარის დედისთვის ვიზის მოსაკრებელი გაუქმდა, ხოლო მოგზაურობისთვის აუცილებელი ყველა პროცედურა უმოკლეს ვადაში მოგვარდა.

„არცერთმა დედამ არ უნდა გამოტოვოს შანსი, იხილოს საკუთარი შვილის ისტორიული მომენტი“, — დაწერა ჯეფრისმა სოციალურ ქსელში. კაბო-ვერდელი მეკარის დედამ, ანა კანდიდა ევორამ, უკვე დაადასტურა, რომ მაიამიში გასამგზავრებლად ემზადება.

ვოზინიამ ესპანეთთან ფრედ დასრულებული მატჩის შემდეგ ემოციურად ისაუბრა. მან გაიხსენა გარდაცვლილი ბებია და ბაბუა, რომლებმაც მისი აღზრდაში გადამწყვეტი როლი ითამაშეს. მეკარემ აღნიშნა, რომ სწორედ მათ გამო და ოჯახისადმი სიყვარულის გამო გადაწყვიტა კარიერის გაგრძელება, მიუხედავად იმისა, რომ პროფესიონალურ ფეხბურთში გვიან, 25 წლის ასაკში მოვიდა.

ისტორიული ასპარეზი

40 წლისა და 12 დღის ვოზინია გახდა ყველაზე ასაკოვანი მოთამაშე, რომელმაც მსოფლიო ჩემპიონატის სადებიუტო მატჩში მიიღო მონაწილეობა. ის ამჟამად პორტუგალიის მეორე ლიგის კლუბ „შავეშში“ თამაშობს და მის კარიერაში სლოვაკეთის, ანგოლას, მოლდოვისა და კვიპროსის კლუბებია.

2 ფოტო — დააჭირე გასადიდებლად

კაბო-ვერდეს ნაკრები მომდევნო შეხვედრას ურუგვაის წინააღმდეგ 21 ივნისს გამართავს, ხოლო 27 ივნისს საუდის არაბეთს დაუპირისპირდება. გუნდისთვის ეს ტურნირი უდიდესი გამოცდილებაა, ხოლო ვოზინიასთვის — კარიერის კულმინაცია, რომელსაც ოჯახის მხარდაჭერა კიდევ უფრო გაამყარებს.