კოტ-დ'ივუარის ეროვნული ნაკრების თავდამსხმელი ელიე ვაჰი კანადაში შესვლაზე უარს მიიღო. „ნისის“ 23 წლის ფეხბურთელი გუნდთან ერთად გერმანიის ნაკრების წინააღმდეგ გასამართ მატჩში მონაწილეობას ვერ შეძლებს.

მიზეზი ფეხბურთელის მიმართ მიმდინარე სამართლებრივი დავაა. გასულ თვეს საფრანგეთის ლიგა 1-ში ფსონების მანიპულირების სკანდალი აგორდა, რომელშიც ვაჰის სავარაუდო მონაწილეობა გამოიკვეთა. საფრანგეთის პროფესიონალურმა საფეხბურთო ლიგამ (LFP) დაადასტურა, რომ მათ მიიღეს შეტყობინება „არაჩვეულებრივად დიდი რაოდენობის ფსონებზე“, რომლებიც კონკრეტულად ვაჰის გაფრთხილებას უკავშირდებოდა.

საუბარია მაისში, „მეცის“ წინააღმდეგ გამართულ მატჩზე, სადაც ვაჰიმ ყვითელი ბარათი მიიღო. მარსელის პროკურატურამ დაადასტურა, რომ 23 წლის ფეხბურთელი, რომელიც საფრანგეთის ჩემპიონატში თამაშობს, ორგანიზებული თაღლითობისა და სპორტული კორუფციის საქმეზე დააკავეს. დაკითხვის შემდეგ ის გაათავისუფლეს, თუმცა გამოძიება გრძელდება.

კოტ-დ'ივუარის ფეხბურთის ფედერაციამ (FIF) განაცხადა, რომ მათ ოფიციალურად არ მიუღიათ შეტყობინება მოთამაშის წინააღმდეგ დაწყებული სისხლისსამართლებრივი დევნის შესახებ, თუმცა კანადის საზღვარზე ვიზასთან დაკავშირებული პრობლემები დაადასტურეს. ფედერაციის ცნობით, ვაჰი ამჟამად აშშ-ში რჩება და გუნდის დაბრუნებას ელოდება.

აღსანიშნავია, რომ ვაჰი მსოფლიო თასის მიმდინარე გათამაშებაში მეორე ფეხბურთელია, რომელსაც კანადაში შესვლაზე უარი ეთქვა. მანამდე ანალოგიური ბედი გაიზიარა განის ნაკრების ნახევარმცველმა თომას პარტიმ, რომელსაც დიდ ბრიტანეთში მიმდინარე სისხლისსამართლებრივი პროცესების გამო არ მიეცა ქვეყანაში შესვლის ნებართვა.

ფეხბურთის ფედერაციები აცხადებენ, რომ მაქსიმალურად ცდილობენ დაიცვან თამაშის მთლიანობა და მკაცრად უპასუხებენ ნებისმიერ ქმედებას, რომელიც სპორტულ პრინციპებს საფრთხეს შეუქმნის. თუმცა, ვაჰის შემთხვევაში საბოლოო გადაწყვეტილებას გამოძიების მიმდინარეობა განსაზღვრავს.