UFC-ის ყოფილმა ჩემპიონმა ილია თოფურიამ ჯასტინ გეიჯისთან გამართული დაძაბული ორთაბრძოლის შემდეგ, პირველი კომენტარები გააკეთა. თუმცა, საუბარი არა საკუთარ ტრავმებზე ან წაგებულ ქამარზე, არამედ გულშემატკივრების კმაყოფილებაზე დაიწყო.

მებრძოლის მენეჯერმა, ხოსე მარია დიასმა, მედიასთან საუბრისას გაამხილა, თუ რა იყო „ელ მატადორის“ პირველი კითხვა კლინიკაში გადაყვანისას. თოფურიამ მენეჯერს ჰკითხა: „ისიამოვნეს ფანებმა ბრძოლით? მაგარი ბრძოლა იყო, არა?“

შოუ გულშემატკივრებისთვის

დიასის თქმით, ეს კითხვა იდეალურად ასახავს თოფურიას პიროვნებას. მიუხედავად იმისა, რომ სპორტსმენისთვის გამარჯვება უმთავრესია, ის მაინც დიდ ყურადღებას აქცევს სანახაობის ხარისხს. თოფურია ცდილობს, ოქტაგონზე გამოსვლა ნამდვილ შოუდ აქციოს.

„ის ყოველთვის მზადაა, ყველაფერი გაიღოს ხალხის გასართობად. მან დაამტკიცა, რომ მისი ბრძოლები უმაღლესი დონისაა. Fight of the Night-ის სტატუსი, რომელიც მან ამ დაპირისპირებისთვის მიიღო, ამის საუკეთესო დასტურია“, - აცხადებს მენეჯერი.

მომავლის რწმენა

მიუხედავად იმისა, რომ UFC Freedom 250-ზე გამართული ბრძოლა თოფურიასთვის მარცხით დასრულდა, გუნდი ოპტიმიზმს ინარჩუნებს. მენეჯერის განცხადებით, ტექნიკური წაგება შედეგს არ ცვლის იმ მხარდაჭერის ფონზე, რომელიც ილიამ მიიღო.

„როგორც ილიამ მართებულად აღნიშნა, რწმენა არის ბოლო რამ, რასაც დავკარგავთ. იმ პატივისცემით, რაც მან ამდენი ადამიანისგან დაიმსახურა, ეს ნამდვილად არ ჰგავს მარცხს,“ - აღნიშნა დიასმა.

ამჟამად ილია თოფურია თავს კარგად გრძნობს. მადლობა ღმერთს, მას სერიოზული დაზიანებები არ აღენიშნება. ქართველი მებრძოლი მკურნალობის პროცესს სახლის პირობებში აგრძელებს და, მენეჯერის თქმით, მისი განწყობა კვლავ პოზიტიური და ამაღლებულია.