დიდი საფეხბურთო ტურნირები ხშირად გვჩუქნიან მოულოდნელ გმირებს. 2026 წლის მსოფლიო ჩემპიონატზე მთავარ სენსაციად 40 წლის კაბო-ვერდელი მეკარე, ჟოზიმარ დიაში, იგივე ვოზინია იქცა. ნაკრები, რომელიც მუნდიალზე პირველად ასპარეზობს, ესპანეთს დაუპირისპირდა და მატჩი ფრედ, 0:0 დაასრულა.

ვოზინიამ ესპანელთა შვიდი სახიფათო დარტყმა მოიგერია და დამსახურებულად დასახელდა შეხვედრის საუკეთესო მოთამაშედ. მატჩამდე მეკარეს Instagram-ზე 50 000 გამომწერი ჰყავდა, თუმცა ორ დღეში ეს რიცხვი 12 მილიონს გადასცდა.

ჟოზიმარ დიაში 1986 წლის 3 ივნისს, მინდელუში დაიბადა. ვინაიდან მშობლები მუდმივად მუშაობდნენ, ის ბებიამ და ბაბუამ გაზარდეს. მეტსახელი „ვოზინია“, რაც პორტუგალიურად „ბებიას“ ნიშნავს, სწორედ ბავშვობის ეპიზოდებს უკავშირდება. თანატოლები დასცინოდნენ, რომ ჩხუბის შემდეგ ის ყოველთვის ბებიასთან გარბოდა საწუწუნოდ.

„მშობლებთან არასდროს მიცხოვრია. ჩვენს უბანში უფროსები მუდმივად მჩაგრავდნენ, მე კი წაგება არ მიყვარდა და სახლში გაბრაზებული ვბრუნდებოდი“, — იხსენებდა მეკარე ინტერვიუში.

ესპანეთთან მატჩის შემდეგ ვოზინიამ ცრემლები ვერ შეიკავა. მან გულწრფელად ისაუბრა იმ ემოციებზე, რაც მის ცხოვრებაში განვლილმა რთულმა გზამ გამოიწვია. „ვტიროდი, რადგან ბებია და ბაბუა, რომლებმაც გამზარდეს, ჩემ გვერდით არ არიან. ისინი რამდენიმე წლის წინ გარდაიცვალნენ, დედაჩემმა კი ვიზის პრობლემების გამო ჩამოსვლა ვერ შეძლო“, — განაცხადა მეკარემ.

ვოზინიას კარიერა სტანდარტული არ არის. პროფესიონალურ დონეზე ის მხოლოდ 25 წლის ასაკში მოხვდა. მან გზა დაიწყო ადგილობრივი „ბატუკესა“ და „მინდელენსეს“ გუნდებიდან, შემდეგ კი ანგოლასა და ევროპის სხვადასხვა კლუბში, მათ შორის კიშინიოვის „ზიმბრუსა“ და პორტუგალიურ „ჟილ ვისენტეში“ ითამაშა.

ერთადერთი ტიტული მეკარემ 2019 წელს კვიპროსის თასის მოგებით დაისაკუთრა. კაბო-ვერდეს ნაკრების ღირსებას ის 2012 წლიდან იცავს და უკვე 89 მატჩი აქვს ჩატარებული. 2025 წელს ვოზინია აფრიკის საუკეთესო მეკარის ჯილდოზეც იყო ნომინირებული.

Transfermarkt-ის მონაცემებით, 40 წლის მეკარის საბაზრო ღირებულება ამჟამად 50 000 ევროს შეადგენს. მუნდიალზე ის ფაქტობრივად თავისუფალი აგენტის სტატუსით გაემგზავრა, რადგან მისი კონტრაქტი პორტუგალიურ „შავეშთან“ იწურება.