ტექნოლოგიური სტარტაპი Shift რადიკალურ მეთოდს მიმართავს ხელოვნური ინტელექტის გასავითარებლად. კომპანია მომხმარებლებს სთავაზობს სახლის უფასო დალაგებას, თუმცა ამ სერვისს ერთი მნიშვნელოვანი პირობა აქვს: ყოველი მოძრაობა, დასუფთავების პროცესი და დეტალი ვიდეოზე უნდა აისახოს.

Shift-ის მიზანია, მიღებული ვიდეომასალა გამოიყენოს რობოტების გასაწვრთნელად. კომპანიის თანადამფუძნებლის, ბერკან კილიჩის განცხადებით, დალაგების შედეგად მიღებული მონაცემები იმდენად ღირებულია, რომ ის სრულად ფარავს მომსახურების ხარჯებს.

როგორ მუშაობს „ჯადოსნური ქუდი“?

სარეკლამო ვიდეორგოლებში ჩანს, რომ დამლაგებლები ატარებენ სპეციალურ, ვიზუალურად უჩვეულო თეთრ ქუდს. ეს აქსესუარი რეალურად კამერას შეიცავს, რომელიც დასუფთავების პროცესს დამლაგებლის თვალით, ე.წ. პირველი პირის პერსპექტივიდან იწერს.

კომპანია პირობას დებს, რომ მომხმარებლების კონფიდენციალურობა დაცულია. მათი მტკიცებით, ვიდეომასალის დამუშავებამდე ხდება სახეების, სახელების, პირადობის მოწმობებისა და ეკრანებზე არსებული პირადი მონაცემების დაბლარვა და ანონიმიზაცია.

მომავლის ტექნოლოგიები თუ შეჭრა პირად სივრცეში?

Shift-ის გეგმები მხოლოდ დალაგებით არ შემოიფარგლება. კომპანია აცხადებს, რომ სამომავლოდ აპირებს სხვა სფეროებშიც შევიდეს, როგორიცაა სანტექნიკა, კულინარია და მშენებლობა. „დღეს დალაგებული ყოველი სახლი საფუძველს უყრის ხვალინდელ სახლს, რომელიც თავისით დალაგდება“, — აღნიშნავენ კომპანიაში.

ამჟამად სერვისი მხოლოდ ნიუ-იორკშია ხელმისაწვდომი, თუმცა უახლოეს პერიოდში გაფართოებას გეგმავენ სან-ფრანცისკოში, ლონდონში, ციურიხსა და მიუნხენში. აღსანიშნავია, რომ დამლაგებლები არ არიან Shift-ის უშუალო თანამშრომლები, მათ პარტნიორი კომპანიები არჩევენ.

სტარტაპი უკვე იყენებს ათიათასობით ადამიანს მსოფლიოს 15 ქვეყანაში, რომლებიც საკუთარი საქმიანობის ვიდეოჩანაწერებს აწვდიან ხელოვნური ინტელექტის მოდელების დასახვეწად. ეს მიდგომა სულ უფრო პოპულარული ხდება ტექნოლოგიურ სექტორში, სადაც რეალური ადამიანური მოქმედებების მონაცემები რობოტიკის განვითარებისთვის კრიტიკულად მნიშვნელოვანია.