საფრანგეთის სამხრეთ-დასავლეთით მდებარე პატარა ქალაქ ფლორანსში 11 წლის ლიჰანას დაკრძალეს. გოგონა ორი კვირის წინ მოკლეს, რამაც ადგილობრივი მოსახლეობა და მთელი საფრანგეთი შოკში ჩააგდო. დაკრძალვის ცერემონიას ოჯახის წევრებთან ერთად უამრავი მოქალაქე შეუერთდა.

საქმემ საზოგადოებრივი მღელვარება გამოიწვია, რადგან გაირკვა, რომ მთავარი ეჭვმიტანილი, 41 წლის ჟერომ ბარელა, პოლიციისთვის დიდი ხნის წინ ცნობილი იყო. ბარელა ჯერ კიდევ ცხრა თვის წინ დაასმინეს 10 წლის გოგონას მიმართ სექსუალური ძალადობის ბრალდებით, თუმცა გამომძიებლებს მასთან დაკითხვაც კი არ უცდიათ.

გამოცემა Le Monde-ის ცნობით, აშშ-ის ხელისუფლებამ საფრანგეთის პოლიციას ბარელას ინტერნეტაქტიურობის შესახებ აცნობა, რაც ბავშვთა პორნოგრაფიის შესაძლო მოხმარებაზე მიუთითებდა. საფრანგეთის არასრულწლოვანთა დაცვის ოფისმა (OFMIN) ეს სიგნალი 2023 წელს მიიღო, თუმცა ის „სუსტად“ შეაფასა და რეაგირება არ მოუხდენია.

ტრაგედიის შემდეგ, ბარელას ოჯახის წევრების მიმართაც ახალი ბრალდებები გაჩნდა. მისი ძმა, იანიკი, გაუპატიურების საქმეზე გამოძიების ქვეშ იმყოფება, ხოლო მამას, 71 წლის ჟოელს, 2019 წელს დაწყებული სექსუალური ძალადობის საქმე ხელახლა გაუხსნეს.

საფრანგეთის იუსტიციის მინისტრი ჟერალ დარმანენი აცხადებს, რომ მომხდარი არ არის რესურსების ნაკლებობის ბრალი. მისი თქმით, სისტემამ ვერ შეძლო პრიორიტეტების სწორად განსაზღვრა ისეთ საქმეში, რომელიც აშკარად სერიოზული იყო.

პრემიერ-მინისტრმა სებასტიან ლეკორნუმ პირობა დადო, რომ კანონმდებლობას გაამკაცრებს, მათ შორის გაზრდის სასჯელს არასრულწლოვანთა მიმართ სექსუალური ძალადობისთვის. თუმცა, უფლებადამცველი ჯგუფები ითხოვენ სისტემურ ცვლილებებს და 2.7 მილიარდი ევროს გამოყოფას ძალადობის წინააღმდეგ ბრძოლისთვის.

„ეს არ არის ემოციური ისტერიკა, ჩვენ სტრუქტურული ცვლილებები გვჭირდება“, — აცხადებს პროფკავშირების ლიდერი სოფი ბინე. ქვეყნის მასშტაბით აქტივისტები ყოველ ორშაბათს სასამართლოებთან საპროტესტო აქციების გამართვას გეგმავენ.

Reuters