„მითხრა, რომ მალე სახლში იქნებოდა. ვერასდროს წარმოვიდგენდი, თუ ასე დამიბრუნდებოდა“, – ამბობს პატნალა ბარგავი, რომლის მეუღლე, ინდოელი მეზღვაური პატნალა სურეში, ომანის ყურეში აშშ-ის სამხედრო ოპერაციის დროს დაიღუპა.

წყვილი ამ თვეში ქორწინების 15 წლისთავს აღნიშნავდა. ნაცვლად ზეიმისა, ბარგავი მეუღლის გარეშე დარჩენილ მომავალს ეგუება.

სურეში იმ სამ ინდოელ მეზღვაურს შორის იყო, რომლებიც ოთხშაბათს აშშ-ის სამხედრო ძალების მიერ ნავთობტანკერ MT Settebello-ზე მიტანილი იერიშის შედეგად დაიღუპნენ. ვაშინგტონის განცხადებით, ტანკერი ირანთან დაკავშირებულ ნავთობს ეზიდებოდა და არაერთგზის გაფრთხილების მიუხედავად, ბლოკადა დაარღვია. გემის მენეჯმენტი ამ ვერსიას უარყოფს და აცხადებს, რომ ტანკერს ირანთან კავშირი არ ჰქონია და არანაირი გაფრთხილება არ მიუღია.

ინციდენტის დროს გემის 21 წევრი გადარჩა. დაღუპულთა ოჯახები ინდოეთის მასშტაბით, სხვადასხვა ქალაქში სამართლიანობას და საყვარელი ადამიანების ცხედრების დაბრუნებას ითხოვენ. ინდოეთის საზღვაო მინისტრმა სარბანანდა სონოვალმა მომხდარს „უდიდესი დანაკარგი“ უწოდა და განაცხადა, რომ მთავრობა ცხედრების სამშობლოში დასაბრუნებლად აქტიურად მუშაობს.

Centcom

ინდოეთმა ვაშინგტონს ოფიციალური პროტესტიც გამოუცხადა და მოითხოვა კომერციულ გემებზე თავდასხმების შეწყვეტა. თუმცა, ბარგავისთვის ეს გეოპოლიტიკური დაპირისპირება გაცილებით შორსაა. იგი მუდმივად მეუღლესთან ბოლო საუბარს იხსენებს.

„ამ არეალში თავდასხმები ხდება და ზოგიერთი ადამიანი დაიღუპა კიდეც. მაგრამ ჩემზე არ ინერვიულო. სახლში უსაფრთხოდ დავბრუნდები და ჩვენს იუბილეს სათანადოდ აღვნიშნავთ“, – იხსენებს ბარგავი სურეშის უკანასკნელ სიტყვებს.

სურეში 15 წელი მუშაობდა ზღვაში, როგორც საზღვაო ინჟინერი. მისი მამის თქმით, შვილი თავის საქმეს ეტრფოდა და შვებულების აღებას ხშირად თავს არიდებდა. ოჯახი მიჩვეული იყო მის ხანგრძლივ არყოფნას, თუმცა 5 ივნისის შემდეგ კავშირი გართულდა, 9 ივნისს კი საერთოდ შეწყდა.

გემის მენეჯმენტის ინფორმაციით, დარტყმის მომენტში სურეში გენერატორის გაუმართაობას ამოწმებდა და გადარჩენის შანსი არ ჰქონია. ოჯახი ამჟამად მთავრობისგან ფინანსურ დახმარებას ითხოვს, რადგან სურეში ოჯახის ერთადერთი მარჩენალი იყო. ანალოგიურ ტკივილს განიცდიან დაღუპული 23 წლის ადიტა შარმასა და 35 წლის შივანანდ ჩაურასიას ოჯახებიც, რომლებიც კითხვებზე პასუხს ეძებენ – რატომ ვერ მოხერხდა მათი გადარჩენა, მაშინ როცა ეკიპაჟის დანარჩენი წევრები ცოცხლები გადარჩნენ.

Saurabh Chauhan and @CMOFFICEHP