ესპანეთის ყოფილი პრემიერ-მინისტრი ხოსე ლუის როდრიგეს საპატერო სამართლებრივი დევნის ახალი ტალღის წინაშე აღმოჩნდა. ხელისუფლებამ პოლიტიკოსის ოფისში ჩატარებული ჩხრეკისას 1.2 მილიონი ევროს ღირებულების ძვირფასეულობა, მათ შორის საათები, ყელსაბამები და ბეჭდები აღმოაჩინა.

გამოძიება საპატეროს, რომელიც სოციალისტური პარტიის გავლენიან ფიგურად რჩება, საბაჟო გადასახადების გადაუხდელობასა და კონტრაბანდაში ადანაშაულებს. ესპანური მედიის ცნობით, სამკაულები დამზადებულია ზამბიასა და ტაილანდიდან შემოტანილი ოქროს, საფირონისა და ზურმუხტისგან.

გამოძიების დეტალები

საპატეროს სპიკერმა, ლუის აროიომ განაცხადა, რომ ყოფილი პრემიერი მზადაა, სასამართლოს წინაშე სათანადო განმარტებები გააკეთოს. თავად პოლიტიკოსთან დაახლოებული პირები აცხადებენ, რომ ძვირფასეულობა ოჯახურ მემკვიდრეობას უკავშირდება. მიუხედავად ამისა, პროკურატურა მოითხოვს მტკიცებულებებს საბაჟო მოსაკრებლების გადახდის შესახებ.

ეს არის პირველი შემთხვევა ესპანეთის უახლეს ისტორიაში, როდესაც ქვეყნის ყოფილი პრემიერ-მინისტრი ოფიციალურად იქნა გამოძიებული. საპატერო სასამართლოში ჩვენების მისაცემად მიმდინარე თვის ბოლოსაა დაბარებული.

პოლიტიკური ფონი

საპატეროს წინააღმდეგ მიმდინარე ეს საქმე სოციალისტური პარტიისთვის მორიგი დარტყმაა. ყოფილი პრემიერი უკვე ფიგურირებს 2021 წლის ავიაკომპანია „Plus Ultra“-ს 53-მილიონიანი სამთავრობო დახმარების საქმეში. მას ბრალად ედება გავლენების გამოყენება და სანაცვლოდ კომისიური თანხების მიღება, რასაც საპატერო კატეგორიულად უარყოფს.

Getty Images

ავიაკომპანიის დახმარება კოვიდ-პანდემიის დროს სტრატეგიული კომპანიების მხარდასაჭერად შექმნილი ფონდიდან განხორციელდა. პარალელურად, პოლიციამ ჩხრეკა ჩაატარა სოციალისტური პარტიის მადრიდის ოფისში, სადაც დოკუმენტაცია დალუქეს. გამოძიება ასევე ეხება მოქმედი პრემიერ-მინისტრის, პედრო სანჩესის ოჯახის წევრებსა და პარტიის მაღალჩინოსნებს, რომლებიც ყველა ბრალდებას უარყოფენ.