ირანმა „საუთ პარსის“ გაზის საბადოზე, კერძოდ კი სამ ოფშორულ პლატფორმაზე, ბუნებრივი აირის მოპოვება აღადგინა. ინფორმაციას „პარს ოილ ენდ გაზ კომპანის“ ხელმძღვანელი ტურაჯ დეჰყანი ავრცელებს.

მარტის შუა რიცხვებში ისრაელის სამხედრო ძალებმა იერიში მიიტანეს „საუთ პარსზე“, რომელიც მსოფლიოში ბუნებრივი აირის უდიდეს საბადოდ მიიჩნევა. აღნიშნულ თავდასხმას ირანის მხრიდან საპასუხო სარაკეტო და დრონებით იერიშები მოჰყვა, რაც რეგიონში ენერგეტიკულ ინფრასტრუქტურაზე დაძაბულობის ესკალაციით დასრულდა.

ტურაჯ დეჰყანის განმარტებით, პლატფორმები თავდასხმების შედეგად ფიზიკურად არ დაზიანებულა. ამ ეტაპზე მოპოვებული რესურსი რეგიონის სხვა გადამამუშავებელ ქარხნებში იგზავნება, პარალელურად კი დაზიანებული ნაწილების სარემონტო სამუშაოები გრძელდება.

აპრილის დასაწყისში ისრაელმა ირანის უდიდეს ნავთობქიმიურ კომპლექსზეც მიიტანა იერიში, რომელიც ასალუიეს სანაპირო ზოლში მდებარეობს. თეირანიდან გავრცელებული ცნობებით, ენერგეტიკული ობიექტების ამოქმედება ირანისთვის როგორც პრაქტიკული, ისე სიმბოლური მნიშვნელობის მატარებელია. ხელისუფლება ცდილობს დაანახოს საერთაშორისო თანამეგობრობას, რომ დაზიანებული ინფრასტრუქტურის აღდგენა პრიორიტეტულია.

„საუთ პარსი“ ირანის საშინაო ენერგომომარაგების მთავარი წყაროა. ქვეყანა ხშირად განიცდის ელექტროენერგიის დეფიციტს, ამიტომ საბადოს გამართული მუშაობა კრიტიკულად მნიშვნელოვანია. 9 700 კვადრატულ კილომეტრზე გადაჭიმული საბადო ირანსა და კატარს შორის არის გაყოფილი, სადაც ირანული ნაწილი „საუთ პარსის“, ხოლო კატარული — „ჩრდილოეთის ველის“ სახელითაა ცნობილი.

ამჟამად ვაშინგტონსა და თეირანს შორის მოლაპარაკებები გრძელდება. მიუხედავად ამისა, ირანის მთავარი მომლაპარაკებლის განცხადებით, თეირანი არ დათანხმდება არანაირ შეთანხმებას, რომელიც ქვეყნის სრულფასოვან უფლებებს არ გაითვალისწინებს. აშშ-ის ადმინისტრაცია კი ირანის პორტების ბლოკირებას აგრძელებს, რაც ომის დასრულებისკენ მიმართული ზეწოლის ნაწილია.