სომხეთის პრემიერ-მინისტრ ნიკოლ ფაშინიანის მიერ გაცხადებული „რეალური სომხეთის“ კონცეფცია რეგიონული ლოგისტიკური რუკის გადააზრებას მოითხოვს. ეს პროცესი განსაკუთრებით აქტუალურია საქართველოსთვის, რომელიც კავკასიის სატრანზიტო ჰაბის ფუნქციას ასრულებს და ჩინეთის სტრატეგიულ პარტნიორად რჩება.

2 ფოტო — დააჭირე გასადიდებლად

საქართველო და ჩინეთი 2023 წლიდან სტრატეგიულ პარტნიორობაზე გადავიდნენ, რამაც ორ ქვეყანას შორის ვაჭრობისა და ტურიზმის მაჩვენებლები მკვეთრად გაზარდა. ოფიციალური სტატისტიკით, 2026 წლის იანვარ-აპრილში ქვეყნებს შორის სავაჭრო ბრუნვამ 933,3 მილიონი დოლარი შეადგინა, რაც წინა წლის ანალოგიურ პერიოდთან შედარებით 45,2%-იანი ზრდაა. ჩინეთი დღეს საქართველოს სამი უმსხვილესი სავაჭრო პარტნიორიდან ერთ-ერთია.

ეკონომიკის ექსპერტი ვახტანგ არჩვაძე მიიჩნევს, რომ საქართველოს როლი „შუა დერეფნის“ განვითარებაში გადამწყვეტია. ცენტრალური აზიიდან და ჩინეთიდან ევროპის მიმართულებით ტვირთნაკადების გადაზიდვა საქართველოსთვის პრიორიტეტული მიმართულებაა, რაც დადასტურდა კიდეც ჩინეთთან გაფორმებული ყოვლისმომცველი სტრატეგიული პარტნიორობის შეთანხმებით.

ექსპერტის განმარტებით, რეგიონული ქვეყნების ეკონომიკური ინტერესების თანხვედრა შესაძლოა კონკურენციაზე მეტად, საერთო სარგებლის მომტანი აღმოჩნდეს. არჩვაძის თქმით, საქართველო, აზერბაიჯანი და სომხეთი ერთმანეთისთვის ეკონომიკურად აუცილებელ პარტნიორებად უნდა იქცნენ, რაც სამივე რესპუბლიკის პოტენციალს გაზრდის.

„უნდა შევხედოთ უფრო ფართოდ და არა მხოლოდ იმაზე ვიფიქროთ, ვინ ვის წაართმევს ტვირთნაკადებს. თუ ეს ქვეყნები ურთიერთგაგებას მიაღწევენ, საბოლოო ჯამში, ყველა მათგანი მოგებული დარჩება“, — აღნიშნავს არჩვაძე. რეგიონული სტაბილურობა და ლოგისტიკური კავშირების გაძლიერება გრძელვადიან პერსპექტივაში საქართველოს სატრანზიტო ფუნქციას კიდევ უფრო გაამყარებს.