„ნაციონალურ მოძრაობაში“ შიდაპარტიული ცვლილებები იწყება. მიხეილ სააკაშვილის მიერ დაანონსებული რადიკალური გარდაქმნების ფონზე, პარტიაში უკვე საუბრობენ ივნისში დაგეგმილ ყრილობაზე, სადაც გუნდის შემადგენლობის საკითხი საბოლოოდ გადაწყდება.

პარტია „ერთიანობა - ნაციონალური მოძრაობის“ გენერალური მდივნის მოადგილე, ირაკლი ფავლენიშვილი აცხადებს, რომ ივნისში პარტიის წევრების უფლებამოსილების ვადა იწურება. მისი თქმით, ყრილობა სწორედ იმ პროცესის ნაწილია, რომელიც პარტიის გაძლიერებასა და სამომავლო სტრატეგიის განსაზღვრას ისახავს მიზნად.

პასუხი კრიტიკასა და ალიანსის დაშლას

ფავლენიშვილი უარყოფს ბრალდებებს, თითქოს „ნაციონალური მოძრაობა“ წესდებას არღვევდეს. პირიქით, ის ალიანსის სხვა წევრებს, მათ შორის თამარ ჩერგოლეიშვილსა და ნიკა გვარამიას, მიუთითებს წესდების დარღვევაში. მისი განმარტებით, პარტიის ლიდერების მიმართ არაეთიკური თავდასხმები და შეურაცხმყოფელი რიტორიკა მიუღებელია.

„თუ წესდება დაირღვა, ეს დაარღვია ქალბატონმა თამარ ჩერგოლეიშვილმა, ბატონმა გვარამიამ და სხვა ადამიანებმაც. როცა ჩვენზეა ბრალდება, სინამდვილეში ალიანსის სხვა წევრები იყვნენ, ამიტომ ბრალდებები არის სრულიად მცდარი,“ - აცხადებს ფავლენიშვილი.

ვინ დარჩება პარტიაში?

პოლიტიკოსი ხაზს უსვამს, რომ „ნაციონალური მოძრაობის“ ყოფილი და მოქმედი წევრები პარტიისთვის დიდ ძალას წარმოადგენენ. მისი თქმით, მნიშვნელოვანია, რომ გუნდმა შეინარჩუნოს ადამიანური რესურსი, რადგან თითოეული მათგანის გამოცდილება პარტიის დღის წესრიგისთვის არსებითია.

„მარტო ნანუკა ჟორჟოლიანი ხომ არ არის. ის ხალხი, ვინც იყო „ნაციონალურ მოძრაობაში“, უნდა დარჩეს, რადგან პარტიისთვის წარმოადგენს დიდ ძალას,“ - აღნიშნა ფავლენიშვილმა. ამ ეტაპზე უცნობია, რა კონკრეტული გადაწყვეტილებები იქნება მიღებული ყრილობაზე, თუმცა პარტია აშკარად ემზადება ახალი ეტაპისთვის.