ევროპარლამენტმა საქართველოს შესახებ რიგით მერვე რეზოლუცია მიიღო. დოკუმენტი, რომელსაც მმართველი გუნდი „ტრადიციულს“ უწოდებს, კვლავ იმეორებს ევროპელი კანონმდებლების მოთხოვნებს, რომლებიც წინა ანგარიშებშიც ფიგურირებდა.

რა მოთხოვნებია რეზოლუციაში?

ევროპარლამენტის რეზოლუცია რამდენიმე მთავარ საკითხზე ამახვილებს ყურადღებას. კერძოდ, ტექსტი მოიცავს მოწოდებებს ყოფილი პრეზიდენტის, მიხეილ სააკაშვილის გათავისუფლების შესახებ.

ამასთან, დოკუმენტი ითხოვს პერსონალური სანქციების დაწესებას ბიძინა ივანიშვილის, მთავრობის წევრების, სასამართლო სისტემისა და ძალოვანი უწყებების წარმომადგენლების მიმართ.

უვიზო რეჟიმის საკითხი

რეზოლუციის ერთ-ერთი ყველაზე განხილვადი ნაწილი ევროკომისიისთვის გაგზავნილი რეკომენდაციაა. ევროპარლამენტი ითხოვს მექანიზმის შემუშავებას, რომლითაც უვიზო მიმოსვლა მხოლოდ განსაზღვრულ ჯგუფებს — აქტივისტებს, ჟურნალისტებსა და სტუდენტებს შეუნარჩუნდებათ.

მმართველ გუნდში მიაჩნიათ, რომ ეს მიდგომა საზოგადოების დაყოფის პირდაპირი მცდელობაა. პარლამენტის თავდაცვისა და უსაფრთხოების კომიტეტის თავმჯდომარის პირველი მოადგილის, თენგიზ შარმანაშვილის განცხადებით, ეს გადაწყვეტილება საქართველოს მოსახლეობის უმრავლესობის ინტერესებს უგულებელყოფს.

„საზოგადოების სეგრეგაციაზე დაიწყეს საუბარი. თურმე არასამთავრობო ორგანიზაციების წარმომადგენლებს უნდა ჰქონდეთ ვიზალიბერალიზაციის რეჟიმი და სხვებს არა. აქამდეც კი მივიდნენ“, - აცხადებს შარმანაშვილი.

პოლიტიკური შეფასებები

თენგიზ შარმანაშვილის თქმით, მსგავსი რეზოლუციები ევროპულ პოლიტიკურ სივრცეში „ანტიქართული ფონის“ შესანარჩუნებლად გამოიყენება. მისი შეფასებით, ევროპელი დეპუტატების ნაწილი ყალბ ნარატივებზე დაფუძნებულ დასკვნებს აკეთებს.

„ყველა ის ადამიანი, ვინც მათ დირექტივებს პირდაპირ არ ემორჩილება, მათთვის მტერია. ეს არის მცდელობა, ქვეყანაში არსებული მედია და საზოგადოება მათ სასურველ ნარატივებს მოარგონ“, - აღნიშნა დეპუტატმა.

მმართველი პარტიის პოზიციით, ევრობიუროკრატიის ეს ნაბიჯი კიდევ ერთხელ ადასტურებს, რომ მათი მხარდაჭერა მხოლოდ ვიწრო, მათთვის სასურველ ჯგუფებზეა ორიენტირებული, დანარჩენი მოქალაქეების პრივილეგიების ხარჯზე.