„კოალიცია ცვლილებისთვის“ თანათავმჯდომარე ნიკა გვარამიამ სასამართლო სხდომის დაწყებამდე განაცხადა, რომ დაცვის მხარე „საბოტაჟის“ საქმის განხილვის პარალელურად, ელენე ხოშტარიას ჯანმრთელობის მდგომარეობის საკითხის დაუყოვნებლივ შესწავლას მოითხოვს.

გვარამიას თქმით, მოსამართლეს კანონით ეკისრება ვალდებულება, გამოიკვლიოს პროცესის მონაწილის ჯანმრთელობის მდგომარეობა და საჭიროების შემთხვევაში, შესაბამისი ზომები მიიღოს. „თუ ზომები არ იქნება მიღებული, ჩვენ ნაფიქრი გვაქვს, როგორ უნდა მოვიქცეთ“, — განაცხადა გვარამიამ.

ელენე ხოშტარიას ადვოკატმა, შოთა თუთბერიძემ, გასულ დღეს გამართულ ბრიფინგზე განაცხადა, რომ პატიმრის მდგომარეობა საგანგაშოა. ადვოკატის თქმით, ხოშტარიას აღენიშნება სახსრების ძლიერი ტკივილი და გადაადგილების სირთულეები, რის გამოც იგი ჯოხით გადაადგილდება.

ხოშტარიას მეგობარმა ნინო ორდენიძემ პენიტენციურ სამსახურთან გამართულ აქციაზე დაადასტურა, რომ პოლიტიკოსს რევმატიული ართრიტი და ავტოიმუნური დაავადება აწუხებს. მისი თქმით, ხოშტარიამ თანხმობა განაცხადა ჯანმრთელობის მდგომარეობის გასაჯაროებაზე, რაც სიტუაციის სიმძიმეზე მიუთითებს.

თავად ელენე ხოშტარიამ სოციალურ ქსელში გავრცელებულ განცხადებაში მხარდამჭერებს მადლობა გადაუხადა, თუმცა აღნიშნა, რომ არ აპირებს რუსეთის გავლენის ქვეშ მყოფ ინსტიტუტებთან დისკუსიაში შესვლას ან მათთვის რაიმეს თხოვნას.

2 ფოტო — დააჭირე გასადიდებლად

შეგახსენებთ, რომ 24 მარტს მოსამართლე გიორგი არევაძემ ელენე ხოშტარიას 1 წლითა და 6 თვის ვადით პატიმრობა მიუსაჯა. ბრალდება თბილისის მერის, კახა კალაძის საარჩევნო ბანერის „დაზიანებას“ უკავშირდება. ხოშტარია საპატიმროში გასული წლის 15 სექტემბრიდან იმყოფება, მას შემდეგ, რაც გირაოს გადახდაზე უარი განაცხადა.

საერთაშორისო უფლებადამცველი ორგანიზაცია Amnesty International-ი აღნიშნულ გადაწყვეტილებას განსხვავებული აზრის დასჯად აფასებს. „საერთაშორისო გამჭვირვალობა - საქართველო“ კი მიუთითებს, რომ საარჩევნო ბანერის დაზიანება სისხლის სამართლის დანაშაული არ არის და მას მხოლოდ ფინანსური ჯარიმა უნდა მოჰყვებოდეს.

საქმეში ბრალდებულის სტატუსი კიდევ რამდენიმე პოლიტიკოსს აქვს, რის გამოც დაცვის მხარე ითხოვს, რომ სასამართლომ პროცესის მონაწილეთა უფლებები სრულად დაიცვას.