ევროპარლამენტმა საქართველოს შესახებ რიგით მეორე კრიტიკული ანგარიში 436 ხმით დაამტკიცა. დოკუმენტში საუბარია ქვეყანაში მიმდინარე დემოკრატიულ უკუსვლასა და ძალაუფლების ავტოკრატიულ კონსოლიდაციაზე.

ევროპარლამენტარების შეფასებით, „ქართულმა ოცნებამ“ ქვეყნის ევროპული ინტეგრაციის კურსი არა მხოლოდ შეაჩერა, არამედ უკუაქცია. რეზოლუციაში აღნიშნულია, რომ ევროკავშირთან ურთიერთობა მკაცრად უნდა იყოს დამოკიდებული ხელშესახებ და შემოწმებად ნაბიჯებზე, რათა შეიცვალოს რეპრესიებისა და ანტიევროპული დეზინფორმაციის კურსი.

პერსონალური სანქციები და პოლიტიკური შეფასებები

ევროპარლამენტი მოუწოდებს ევროკავშირს და მის წევრ სახელმწიფოებს, დაუყოვნებლივ დააწესონ მიზანმიმართული პერსონალური სანქციები ბიძინა ივანიშვილის, მისი ოჯახის წევრებისა და კომპანიების მიმართ. ასევე, მოთხოვნილია მათი აქტივების გაყინვა.

სანქციების სამიზნე შესაძლოა გახდნენ „ქართული ოცნების“ ლიდერები, მოსამართლეები, პროკურორები და მედიასაშუალებების მფლობელები. რეზოლუცია ასევე მოუწოდებს უნგრეთის მთავრობას, მოხსნას ვეტო ივანიშვილისა და „ქართული ოცნების“ ხელმძღვანელობის წინააღმდეგ ევროკავშირის მასშტაბით დაგეგმილ სანქციებზე.

სამოქალაქო საზოგადოება და მედია

ანგარიშში მკაცრად არის გაკრიტიკებული სამოქალაქო სექტორისა და მედიის შევიწროება. ევროპარლამენტი გმობს „გრანტების შესახებ“ კანონში შეტანილ ცვლილებებს და მათ ასოცირების შეთანხმების დარღვევად მიიჩნევს.

  • ევროპარლამენტი არ აღიარებს საქართველოს პარლამენტისა და მის მიერ დანიშნული პრეზიდენტის ლეგიტიმურობას.
  • მოთხოვნილია პოლიტიკური პატიმრების, მათ შორის მიხეილ სააკაშვილისა და ელენე ხოშტარიას გათავისუფლება.
  • გამოხატულია შეშფოთება ირაკლი ღარიბაშვილის დაპატიმრების გამო, რაც, პარლამენტის აზრით, კითხვის ნიშნებს ბადებს სამართლიანი სასამართლოს სტანდარტებთან დაკავშირებით.
3 ფოტო — დააჭირე გასადიდებლად

ადამიანის უფლებები და ძალადობა

დოკუმენტი გმობს მომიტინგეების წინააღმდეგ ძალის გადაჭარბებულ გამოყენებას, წამებასა და არასათანადო მოპყრობას. ევროპარლამენტი ითხოვს გაეროს ქიმიური იარაღის აკრძალვის ორგანიზაციის მხრიდან საპროტესტო აქციებზე აკრძალული ნივთიერებების შესაძლო გამოყენების გამოძიებას.

ასევე, ხაზგასმულია ლგბტქ+ პირების დისკრიმინაციის პრობლემა და მოთხოვნილია „ოჯახური ღირებულებებისა და არასრულწლოვანთა დაცვის შესახებ“ კანონის გაუქმება, როგორც ადამიანის უფლებების დამრღვევი დოკუმენტი.