კოლექტიური უსაფრთხოების ხელშეკრულების ორგანიზაციის (კუსტ) წევრები სომხეთის წინააღმდეგ ორგანიზაციის წესდებით გათვალისწინებული ზომების გამოყენებას განიხილავენ. მიზეზი ქვეყნის მიერ საწევრო შენატანების ორი წლის განმავლობაში არგანხორციელებაა.

რუსეთის საგარეო საქმეთა მინისტრმა სერგეი ლავროვმა კუსტ-ის საგარეო საქმეთა მინისტრების საბჭოს სხდომის შემდეგ გამართულ პრესკონფერენციაზე განაცხადა, რომ ვითარება ორგანიზაციის წესდების შესაბამისად მოითხოვს რეაგირებას.

ლავროვის განმარტებით, სომხეთის საგარეო საქმეთა მინისტრმა არარატ მირზოიანმა საჯაროდ დაადასტურა, რომ ქვეყანა შენატანებს აღარ იხდის, რადგან ორგანიზაციის საქმიანობაში მონაწილეობას აღარ აპირებს.

3 ფოტო — დააჭირე გასადიდებლად

რა ზომებს ითვალისწინებს წესდება?

კუსტ-ის წესდების 25-ე მუხლი მკაფიოდ განსაზღვრავს ფინანსური ვალდებულებების შეუსრულებლობის შემთხვევაში გასატარებელ ღონისძიებებს. თუ წევრი სახელმწიფო ორი წლის განმავლობაში არ ასრულებს ბიუჯეტის წინაშე აღებულ ვალდებულებებს, ორგანიზაციის საბჭო უფლებამოსილია:

  • შეაჩეროს ქვეყნის წარმომადგენლების უფლება, დაიკავონ კვოტირებული თანამდებობები ორგანიზაციაში.
  • ჩამოართვას ქვეყანას ხმის უფლება ორგანიზაციის ორგანოებში, ვიდრე დავალიანება სრულად არ დაიფარება.

რუსული მხარის თქმით, საკითხი უკვე განხილვის რეჟიმშია და ორგანიზაცია შესაბამისი მუხლების ამოქმედებას აპირებს.

სომხეთის ეს ნაბიჯი კიდევ უფრო ამწვავებს დაძაბულობას ერევანსა და ორგანიზაციას შორის, რომელიც რუსეთის დომინირებით მოქმედებს. საწევრო შენატანების შეწყვეტა პოლიტიკური დისტანცირების მკაფიო სიგნალად ფასდება.