აშშ-ის სახელმწიფო მდივანმა, მარკო რუბიომ, რუს ხალხს რუსეთის დღე მიულოცა. ოფიციალურ მიმართვაში რუბიომ რუსეთის მოქალაქეებს მშვიდობიანი და წარმატებული მომავალი უსურვა.

ამერიკის შეერთებული შტატების სახელმწიფო დეპარტამენტის მიერ გავრცელებულ ოფიციალურ განცხადებაში ხაზგასმულია, რომ ვაშინგტონი კვლავაც მტკიცედ უჭერს მხარს რუსეთ-უკრაინის ომის მშვიდობიანად დასრულებას.

„შეერთებული შტატები კვლავ ერთგულია რუსეთსა და უკრაინას შორის ომის მშვიდობიანი დასრულებისადმი. ჩვენ იმედს ვიტოვებთ, რომ მდგრადი მშვიდობა გზას გაუხსნის რუსი ხალხისთვის უფრო წარმატებულ მომავალს და უფრო კონსტრუქციულ ურთიერთობებს ჩვენს ორ ქვეყანას შორის“, — აღნიშნულია განცხადებაში.

3 ფოტო — დააჭირე გასადიდებლად

აღსანიშნავია, რომ ეს არ არის პირველი შემთხვევა, როდესაც მარკო რუბიო რუსეთის მოსახლეობას რუსეთის დღეს ულოცავს. მსგავსი მისალმება მან გასულ წელსაც გააჟღერა.

ცნობისთვის, მსგავსი დიპლომატიური ჟესტები წარსულში კრიტიკის საგანიც გამხდარა. კერძოდ, უკრაინის საგარეო საქმეთა მინისტრმა, ანდრი სიბიჰამ, ადრე განაცხადა, რომ რუსეთის დღისადმი მიძღვნილი მილოცვების წაკითხვა ზოგიერთი ქვეყნის მხრიდან მისთვის „უსიამოვნო“ იყო.

მიუხედავად დიპლომატიური მილოცვისა, აშშ-ის პოზიცია უკრაინის საკითხთან დაკავშირებით უცვლელი რჩება. ვაშინგტონი აქცენტს აკეთებს იმაზე, რომ მშვიდობიანი თანაარსებობა მხოლოდ ომის დასრულების შემდეგ გახდება შესაძლებელი.