26 მაისის საპროტესტო აქციისთვის ოპოზიციური პარტიების სამოქმედო გეგმა საჯარო ხდება. მედიაში გავრცელებული ინფორმაციით, სტრატეგია, რომლის ქვეშაც ოპოზიციური ფლანგი ერთიანდება, უცხოელი კონსულტანტის, იგორ ბლაჟევიჩის მიერ არის მომზადებული.

გეგმა საერთო სლოგანის - „ქართველი ხალხი უკეთესს იმსახურებს“ - ქვეშ არის გაერთიანებული და ორ ძირითად მიმართულებას მოიცავს. ამ ფაქტს მმართველი გუნდის მხრიდან კრიტიკა მოჰყვა. „ქართულ ოცნებაში“ აცხადებენ, რომ ოპონენტები დამოუკიდებლები არ არიან და გარე ძალების კარნახით მოქმედებენ.

ოპოზიციის პოზიცია

„ერთიანობა - ნაციონალური მოძრაობის“ პოლიტიკური მდივანი გიორგი ბარამიძე გავრცელებულ ინფორმაციას ადასტურებს. მისი თქმით, გასაკვირი არაფერია იმაში, რომ პოლიტიკური გამოსვლები წინასწარ არის გაწერილი.

„ოპოზიციის გამოსვლები რომ წინასწარ იქნება დაწერილი, მაგაში რა არის გასაკვირი? აბა თქვენ გგონიათ, რომ იქ რომ მივალთ, იქ გადავწყვეტთ ყველაფერს? ოპოზიციის ალიანსი ცდილობს, რომ ყველა დეტალი შეათანხმოს,“ - აცხადებს ბარამიძე.

პარტიის კიდევ ერთი წევრი, ლევან ბეჟაშვილი განმარტავს, რომ საორგანიზაციო ღონისძიებებზე მუშაობა რამდენიმე თვეა მიმდინარეობს. ბეჟაშვილის თქმით, აქციაზე გაჟღერებული საკითხები საზოგადოებისთვის ნაცნობი პრობლემებია, რომლებიც განსაკუთრებულ დაგეგმვას არ საჭიროებს.

პოლიტიკური დაპირისპირება

მმართველი გუნდის წარმომადგენლები აქცენტს იმაზე აკეთებენ, რომ ოპოზიციის სტრატეგია ქვეყნის გარეთ არის შედგენილი. მათი მტკიცებით, ეს ინფორმაცია საზოგადოებისთვისაც კარგად არის ცნობილი და ოპოზიცია საკუთარ დღის წესრიგს დამოუკიდებლად ვერ განსაზღვრავს.

ამ ფონზე, პოლიტიკური პროცესები 26 მაისის აქციის მოლოდინში გრძელდება. ოპოზიციური გაერთიანება ცდილობს, საპროტესტო მუხტი კონკრეტული სამოქმედო გეგმის გარშემო კონსოლიდირებული სახით წარმოადგინოს.