1 ივლისიდან საქართველოში კატერების, იახტების, ჰიდროციკლებისა და სხვა მოტორული პლატფორმების მართვა და რეგისტრაცია ახალ წესებს ექვემდებარება. ეკონომიკის სამინისტროს საზღვაო ტრანსპორტის სააგენტოს ინფორმაციით, ცვლილებები მიზნად ისახავს შიდა წყლებში უსაფრთხოების ნორმების გამკაცრებას.

ახალი რეგულაცია ეხება ყველა იმ მოტორულ საშუალებას, რომელიც ტბებზე, მდინარეებსა და წყალსაცავებზე გამოიყენება. მფლობელებს მოეთხოვებათ, გაიარონ ტექნიკური ინსპექტირება აკრედიტებულ ორგანიზაციაში და დაარეგისტრირონ საკუთარი ტექნიკა. გამონაკლისს წარმოადგენს მხოლოდ არამოტორული საშუალებები, რომელთა სიგრძე სამ მეტრზე ნაკლებია და კაიაკები.

სერტიფიცირების პროცესი

მნიშვნელოვანი სიახლეა გემთმმართველი პირებისთვის სავალდებულო სერტიფიკატის შემოღება. დოკუმენტი ხუთწლიანი ვადით გაიცემა და მისი მიღება მხოლოდ 18 წელს მიღწეულ, ქმედუნარიან მოქალაქეებს შეუძლიათ. მსურველებმა სპეციალიზებული საგანმანათლებლო კურსი უნდა გაიარონ, რომელიც ამ ეტაპზე მხოლოდ ბათუმის სახელმწიფო საზღვაო აკადემიაშია ხელმისაწვდომი.

სააგენტომ გარდამავალი პერიოდი ჯერ კიდევ 2025 წლის აპრილში დაიწყო, რა დროსაც მფლობელებს ნებაყოფლობითი რეგისტრაციის შესაძლებლობა ჰქონდათ. ამ დროისთვის რეესტრში 16 სატრანსპორტო საშუალებაა აღრიცხული, ხოლო კვალიფიკაციის დამადასტურებელი სერტიფიკატი 38-მა პირმა მიიღო.

სანქციები და უსაფრთხოება

3 ფოტო — დააჭირე გასადიდებლად

გარდამავალი პერიოდის დასრულების შემდეგ, მაკონტროლებელი ორგანოები დამრღვევთა მიმართ ადმინისტრაციულ პასუხისმგებლობას გაატარებენ, რაც ჯარიმებს გულისხმობს. უწყების მონაცემებით, 2020-2026 წლებში საქართველოს შიდა წყლებში 80 ინციდენტი დაფიქსირდა, რამაც რეგულაციების გამკაცრების აუცილებლობა განაპირობა.