„ლელო-ძლიერი საქართველოს“ ლიდერი სალომე სამადაშვილი სოციალურ ქსელში ელენე ხოშტარიას ჯანმრთელობის მდგომარეობასთან დაკავშირებით განცხადებას ავრცელებს. სამადაშვილი მიიჩნევს, რომ ხოშტარია „წარმოუდგენელი სისასტიკის“ მსხვერპლია.

სამადაშვილის თქმით, განსაკუთრებით საყურადღებოა მმართველი გუნდის წარმომადგენლების, მაკა ბოჭორიშვილისა და თეა ახვლედიანის პოზიცია. მისი განმარტებით, აღნიშნული პირები წლების განმავლობაში ელენე ხოშტარიასთან მჭიდროდ თანამშრომლობდნენ და მეგობრობდნენ.

„განსაკუთრებით მაინტერესებს ივანიშვილის ორი წარმომადგენლის აზრი. რას ფიქრობთ, ელენეს შვილები არ იმსახურებენ ჯანმრთელ დედას? თქვენი შვილები სად არიან? ევროპაში? სარკეში როგორ უყურებთ საკუთარ თავს? ღამე როგორ გძინავთ?“ - წერს სამადაშვილი.

3 ფოტო — დააჭირე გასადიდებლად

ოპოზიციონერი პოლიტიკოსი ხაზს უსვამს, რომ ელენე ხოშტარია, რომელიც ოთხი შვილის დედაა, მთელი თავისი ცხოვრება საქართველოს ევროატლანტიკური მომავლისთვის იბრძოდა. სამადაშვილის თქმით, ამჟამად ხოშტარიას ჯანმრთელობას ბანერზე გაკეთებული წარწერის გამო „უნგრევენ“.

სამადაშვილი აცხადებს, რომ მიუხედავად პოლიტიკური განსხვავებებისა, საზოგადოება ამ მდგომარეობას არ უნდა შეეგუოს. მან ასევე დასვა კითხვა, თუ როგორ აპირებენ ყოფილი მეგობრები ცხოვრების გაგრძელებას „რეჟიმის დასრულების შემდეგ“.

განცხადება სოციალურ ქსელში ფართო რეზონანსს იწვევს და კიდევ ერთხელ აჩენს კითხვებს პოლიტიკური ოპონენტებისადმი, რომლებსაც წარსულში მჭიდრო პირადი და საქმიანი კავშირები აკავშირებდათ.