პოლონეთში, ქალაქ ბიალა პოდლასკაში, ცნობილი რუსი სატირიკოსისა და მხატვრის მკვლელობის საქმეზე სამართალდამცველებმა ეჭვმიტანილი პირი დააკავეს. ინფორმაციას პოლონეთის პრემიერ-მინისტრი დონალდ ტუსკი ავრცელებს.

ოფიციალური განცხადების თანახმად, დაკავების ოპერაცია ლუბლინის პოლიციისა და შიდა უსაფრთხოების სააგენტოს კოორდინირებული მუშაობის შედეგად განხორციელდა. პრემიერ-მინისტრი ხაზგასმით აღნიშნავს, რომ დაკავებული პირი საქართველოს პასპორტს იყენებს.

„შესაბამისი სამსახურები აგრძელებენ გამოძიებას და ცდილობენ დაადგინონ დანაშაულის შესაძლო ორგანიზატორები,“ - წერს ტუსკი სოციალურ ქსელში.

3 ფოტო — დააჭირე გასადიდებლად

შეგახსენებთ, რომ რამდენიმე დღის წინ ბიალა პოდლასკაში რუსი მხატვარი, რომელიც ფსევდონიმით სემიონ სკრეპეცკი იყო ცნობილი, საკუთარ საცხოვრებელ კორპუსთან ჩაცხრილეს. თავდამსხმელმა მას რამდენჯერმე ესროლა.

სკრეპეცკი ცნობილი იყო კრემლის პოლიტიკის მიმართ მკვეთრად კრიტიკული დამოკიდებულებით. თავის სატირულ ნამუშევრებში ის ხშირად აკრიტიკებდა რუსეთის ხელისუფლების წარმომადგენლებს, მათ შორის ვლადიმირ პუტინს.

ამ დროისთვის პოლონეთის საგამოძიებო უწყებები დამატებით დეტალებს არ ასაჯაროებენ. გამოძიების მთავარ მიზანს დანაშაულის მოტივისა და შესაძლო დამკვეთების იდენტიფიცირება წარმოადგენს.

მომხდარი ფაქტი პოლონეთის უსაფრთხოების სამსახურების მჭიდრო მეთვალყურეობის ქვეშაა, რადგან საქმე ეხება რუსეთის მოქალაქის მკვლელობას ევროკავშირის ტერიტორიაზე.