საქართველოს გარემოს დაცვისა და სოფლის მეურნეობის მინისტრი დავით სონღულაშვილი თურქეთში ოფიციალური ვიზიტით იმყოფება. ვიზიტის ფარგლებში მინისტრმა შეხვედრა გამართა თურქეთის სოფლისა და სატყეო მეურნეობის მინისტრ იბრაჰიმ იუმაკლისთან. შეხვედრის მთავარი შედეგი ორ ქვეყანას შორის სოფლის მეურნეობის სფეროში თანამშრომლობის გაღრმავების შესახებ გაფორმებული მემორანდუმებია.

პირველი შეთანხმება ირიგაციისა და დრენაჟის მართვას ეხება. მხარეები შეთანხმდნენ ცოდნის, გამოცდილებისა და ტექნოლოგიების გაზიარებაზე, რაც მიზნად ისახავს სამელიორაციო ინფრასტრუქტურის მოდერნიზაციას. ეს ნაბიჯი საქართველოსთვის მნიშვნელოვანია უკეთესი საირიგაციო მომსახურების უზრუნველსაყოფად.

მეორე მემორანდუმი სატყეო მეურნეობის სფეროში თანამშრომლობას ითვალისწინებს. თანამშრომლობის პრიორიტეტული მიმართულებებია:

  • სატყეო მართვის მდგრადი პრაქტიკები;
  • ნერგების გამოყვანის თანამედროვე ტექნოლოგიები;
  • ბიომრავალფეროვნების დაცვა და ტყის კადასტრის წარმოება;
  • გაუდაბნოებასთან და ეროზიასთან ბრძოლა;
  • ეკოტურიზმის განვითარება.
3 ფოტო — დააჭირე გასადიდებლად
საქართველო და თურქეთი სულ უფრო აძლიერებენ პარტნიორობას. თურქეთს ამ სფეროებში მდიდარი გამოცდილება გააჩნია და ჩვენთვის მნიშვნელოვანია ამ ცოდნის გაზიარება, - განაცხადა დავით სონღულაშვილმა.

თურქეთის სოფლისა და სატყეო მეურნეობის მინისტრმა იბრაჰიმ იუმაკლიმ ხაზი გაუსვა, რომ ქვეყნები მჭიდროდ ითანამშრომლებენ მემცენარეობისა და მავნებლების წინააღმდეგ ბრძოლის მიმართულებითაც. მან მადლობა გადაუხადა ქართულ მხარეს მაღალი დონის მინისტერიალში მონაწილეობისთვის.

ვიზიტის ფარგლებში, დავით სონღულაშვილი ასევე დაესწრება მინისტერიალს, რომელიც სურსათის მიწოდების ჯაჭვში ეფექტიანობის გაზრდასა და მოსავლის აღების შემდგომი დანაკარგების შემცირებას ეძღვნება.