საქართველოს შინაგან საქმეთა სამინისტრო სვანეთში უკანონო კრიპტომაინინგის წინააღმდეგ ბრძოლას აძლიერებს. მთავრობის ადმინისტრაციის უფროსის, ლევან ჟორჟოლიანის განცხადებით, სამართალდამცველებმა რეგიონში დამატებით 42 ერთეული მაინერი ამოიღეს.

3 ფოტო — დააჭირე გასადიდებლად

სპეციალური საპოლიციო ღონისძიებები მესტიის მუნიციპალიტეტში ელექტროენერგიის არაბუნებრივად მაღალმა მოხმარებამ განაპირობა. ოფიციალური მონაცემებით, მესტიაში ელექტროენერგიის წლიური მოხმარება 133 მილიონ კვტ/სთ-ს შეადგენს, რაც ხელისუფლების შეფასებით, მსგავსი ზომის მუნიციპალიტეტისთვის კატასტროფული მაჩვენებელია.

რატომ არის მოხმარება კრიტიკული?

მთავრობის ადმინისტრაციის უფროსის თქმით, მესტიის მსგავსი დასახლებული პუნქტისთვის ელექტროენერგიის ადეკვატური მოხმარება წელიწადში 7-10 მილიონ კვტ/სთ-ს არ უნდა აღემატებოდეს. არსებული 133 მილიონი კვტ/სთ კი პირდაპირ მიუთითებს იმაზე, რომ რეგიონში მასშტაბურად არის განთავსებული მაინინგ მოწყობილობები.

„ჩვენი მიზანია, აღნიშნული მოწყობილობები სრულად იქნეს ამოღებული ამ ტერიტორიიდან. მოვუწოდებთ ადგილობრივ მოსახლეობას, მაქსიმალურად ითანამშრომლონ სამართალდამცავ ორგანოებთან უკანონო სამეწარმეო საქმიანობის გამოსავლენად“, — განაცხადა ლევან ჟორჟოლიანმა.

საპოლიციო ღონისძიებები სვანეთში ამ წუთებშიც გრძელდება. ხელისუფლება მიზნად ისახავს ენერგოსისტემაზე დატვირთვის შემცირებას და უკანონო საქმიანობის სრულად აღმოფხვრას. მესტიის ენერგოკრიზისი წლებია, რაც ქვეყნის დღის წესრიგში დგას, რადგან გადაჭარბებული მოხმარება სისტემურ შეფერხებებს იწვევს.