აშშ-ის პრეზიდენტმა დონალდ ტრამპმა ირანის მიმართ მკაცრი რიტორიკა გააძლიერა. მისი თქმით, ოფიციალურმა თეირანმა ვაშინგტონთან კრიზისის დარეგულირების შესაძლებლობა ხელიდან გაუშვა, რასაც ქვეყნისთვის მძიმე შედეგები მოჰყვება.

ტრამპმა სოციალურ ქსელ Truth Social-ზე გამოქვეყნებულ განცხადებაში აღნიშნა, რომ ირანული მხარე მოლაპარაკებების პროცესს ზედმეტად აჭიანურებდა. პრეზიდენტის შეფასებით, ეს სტრატეგია ირანისთვის წამგებიანი აღმოჩნდა.

„ახლო აღმოსავლეთის მჩაგვრელი მკვდარია. მათ შეთანხმების მისაღწევად ძალიან დიდი დრო დასჭირდათ, შეთანხმების, რომელიც მათთვის შესანიშნავი იქნებოდა. ახლა ეს ყველაფერი მათ ძვირად დაუჯდებათ“, - აცხადებს ტრამპი.
3 ფოტო — დააჭირე გასადიდებლად

პრეზიდენტმა ასევე ისაუბრა ირანის სამხედრო მდგომარეობაზე და განაცხადა, რომ ქვეყნის თავდაცვითი შესაძლებლობები კრიტიკულ ზღვარს ქვემოთაა. მისი თქმით, ირანის არმია, მათ შორის სამხედრო-საზღვაო და სამხედრო-საჰაერო ძალები, ფაქტობრივად აღარ არსებობს.

„ირანის არმია სრულად ჩამოშლილია. მისი დიდი ნაწილი, მათ შორის საზღვაო და საჰაერო ძალები, სრულად განადგურებულია“, - აცხადებს აშშ-ის პრეზიდენტი. ტრამპის მტკიცებით, ირანული მხარე მხოლოდ სიტყვიერ დეკლარაციებს აკეთებს, თუმცა რეალური ქმედებები, რომლებიც სიტუაციას განმუხტავდა, არ განხორციელებულა.

შექმნილი ვითარება მიუთითებს იმაზე, რომ აშშ-ის ადმინისტრაცია ირანთან მიმართებაში პოზიციას ამკაცრებს. ვაშინგტონსა და თეირანს შორის არსებული დაძაბულობა რეგიონში ახალ პოლიტიკურ რეალობას აყალიბებს.