დიდი ბრიტანეთის ფინანსთა მინისტრმა, რეიჩელ რივსმა, ზაფხულის პერიოდისთვის ახალი ეკონომიკური გეგმა წარადგინა. ინიციატივა ითვალისწინებს რესტორნებში საბავშვო მენიუზე დამატებული ღირებულების გადასახადის (დღგ) დროებით, ივნისიდან სექტემბრამდე, 20%-დან 5%-მდე შემცირებას. მთავრობის მიზანი ოჯახებისთვის ხარჯების შემცირება და სტუმარმასპინძლობის სექტორის მხარდაჭერაა.

კრიტიკა ინდუსტრიის მხრიდან

თუმცა, რესტორატორები ამ გადაწყვეტილებას სკეპტიკურად უყურებენ. ლონდონური რესტორან Fallow-ს მფლობელი, უილ მიურეი, ინიციატივას „პოლიტიკურ ხრიკს“ უწოდებს. მისი თქმით, რესტორნების უმეტესობა საბავშვო კერძებს ისედაც ფასდაკლებით ყიდის, ხშირად თვითღირებულებაზე დაბალ ფასად, ამიტომ დღგ-ს მცირე კორექტირება არსებულ ხარვეზს ვერ შეავსებს.

„ეს იმდენად მცირე ჟესტია, რომ რეალურ ცვლილებას ვერ მოიტანს. ბავშვთა კვების ფასები ისედაც ოპტიმიზებულია, 5%-იანი ცვლილება ვერ დაეხმარება ვერც ოჯახებს და ვერც ბიზნესს,“ — აცხადებს მიურეი.

სიმბოლური ნაბიჯი თუ სტრატეგიული ცვლილება?

სხვა რესტორატორები, მათ შორის დენიელ კრამპი, ამ ზომას „სიმბოლურს“ უწოდებენ. მათი აზრით, მთავრობამ უფრო მასშტაბური ნაბიჯები უნდა გადადგას, რათა დიდი ბრიტანეთის საგადასახადო განაკვეთები ევროპულ სტანდარტებს დაუახლოვოს. ევროპაში რესტორნებზე დაწესებული დღგ-ს საშუალო მაჩვენებელი დაახლოებით 12%-ია, მაშინ როცა ბრიტანეთში ეს მაჩვენებელი 20%-ს შეადგენს.

ამ ფონზე, Wetherspoons-ის ქსელის დამფუძნებელი, ტიმ მარტინი, განსხვავებულ პოზიციას აფიქსირებს. კომპანია გეგმავს საბავშვო მენიუს ფასების შემცირებას ზაფხულის განმავლობაში, რაც, მისი თქმით, ოჯახებისთვის ხელშესახები შეღავათი იქნება.

სექტორის მოთხოვნა

ინდუსტრიის ლობისტური ჯგუფი UKHospitality მთავრობას მოუწოდებს, ეს გადაწყვეტილება განიხილოს როგორც პირველი ნაბიჯი უფრო ფართო რეფორმისკენ. ორგანიზაციის თავმჯდომარე ქეით ნიკოლსი ხაზს უსვამს, რომ დღგ-ს შემცირება მთლიანი სექტორისთვის არის ყველაზე ეფექტური ბერკეტი ფასების დასაწევად, ინფლაციის დასაძლევად და სამუშაო ადგილების შესაქმნელად.

მიუხედავად იმისა, რომ ზოგიერთი ბიზნესი მზადაა ფასები შეამციროს, საბოლოო გადაწყვეტილება თითოეული ოპერატორის ინდივიდუალურ არჩევანზე რჩება. ინდუსტრიის წარმომადგენლები თანხმდებიან ერთ რამეზე: გრძელვადიანი სტაბილურობისთვის საჭიროა სისტემური ცვლილებები და არა მხოლოდ დროებითი, საზაფხულო შეღავათები.