კაცობრიობა ათწლეულებია უცხო ცივილიზაციების ძიებაშია, თუმცა შედეგი ჯერ კიდევ არ გვაქვს. SETI-ს (Extra-Terrestrial Intelligence) ახალი კვლევა ვარაუდობს, რომ მიზეზი შესაძლოა არა სიგნალების არარსებობა, არამედ მათი ბუნებრივი დამახინჯება იყოს.

ტრადიციულად, ასტრონომები ეძებენ ე.წ. „ვიწროზოლიან“ რადიოსიგნალებს. ეს არის სიგნალები, რომლებიც კონცენტრირებულია რადიოსიხშირის ძალიან მცირე დიაპაზონში. ასეთი სიგნალები ბუნებრივ კოსმოსურ პროცესებს არ ახასიათებს, ამიტომ მათი დაფიქსირება ხელოვნური წარმოშობის დასტურად ითვლება.

თუმცა, SETI-ს ინსტიტუტის მკვლევრები აღნიშნავენ, რომ ეს სიგნალები შესაძლოა დამახინჯდეს მანამ, სანამ ისინი გამომგზავნი ვარსკვლავური სისტემიდან გამოვლენ. პრობლემა ვარსკვლავის გარემოცვაშია: პლაზმის სიმკვრივის ცვლილებები და ვარსკვლავური ქარები სიგნალს „შლის“.

„SETI-ს ძიებები ხშირად ოპტიმიზებულია უკიდურესად ვიწრო სიგნალებისთვის. თუ სიგნალი ვარსკვლავის გარემოს გამო ფართოვდება, ის შესაძლოა ჩვენი დეტექციის ზღვარს ქვემოთ ჩამოვიდეს“, — აცხადებს კვლევის წამყვანი ავტორი, დოქტორი ვიშალ გაჯარი.

მკვლევრებმა ამ ეფექტის შესასწავლად მზის სისტემაში არსებული კოსმოსური აპარატების მონაცემები გამოიყენეს. მათ დააკალიბრეს, თუ როგორ ზემოქმედებს ტურბულენტური პლაზმა ვიწროზოლიან რადიოსიგნალებზე. შედეგად, შეიქმნა მოდელი, რომელიც გვაჩვენებს, თუ როგორ იცვლება სიგნალი სხვადასხვა ტიპის ვარსკვლავების გარშემო.

კვლევა განსაკუთრებით მნიშვნელოვანია M-კლასის ჯუჯა ვარსკვლავებისთვის. ეს ვარსკვლავები ირმის ნახტომში არსებული ვარსკვლავების დაახლოებით 75%-ს შეადგენენ. მათ გარშემო არსებული აქტიური „კოსმოსური ამინდი“ ხშირად იწვევს სიგნალების დეფორმაციას.

„ჩვენ უნდა შევცვალოთ ძიების სტრატეგია და გავითვალისწინოთ სიგნალები, რომლებიც უფრო ფართოა, ვიდრე ტრადიციულად ნავარაუდევი იყო“, — განმარტავს თანაავტორი გრეის ბრაუნი. ეს მიდგომა მეცნიერებს საშუალებას მისცემს, უფრო ეფექტურად დაასკანერონ კოსმოსი.

პროექტი განხორციელდა SETI-ს ინსტიტუტის STRIDE პროგრამის ფარგლებში, რომელიც მიზნად ისახავს მაღალი რისკის მქონე, მაგრამ ინოვაციური სამეცნიერო იდეების მხარდაჭერას.